Мислам дека уживаа да бидат покрај Доналд и да учествуваат во изборите, но сега е готово. Не сум сигурна какви им се плановите, но јас само им посакувам да продолжат со нормалниот живот, изјави Ивана Трамп.

По неколку дена неизвесност се обелоденија резултатите од американските претседателки избори. Победник е Џо Бајден (77), а резултатите ги коментираше и поранешната сопруга на Доналд Трамп (74), Ивана Трамп (71). Посакала, како што вели, сета оваа драма да заврши што поскоро, но и истакнала дека се сомнева дека Трамп така лесно ќе се откаже.

– Тој е лош губитник. Не сака да губи па ќе продолжи да се бори, бори и бори, изјави Ивана за странските медиуми. Додаде дека сепак се надева дека ќе се соочи со реалноста и ќе отстапи.
– Тој мора да се повлече и да објави дека изгубил, раскажа Ивана па продолжи:

– Јас само сакам сето тоа што поскоро да заврши, на ваков или таков начин. Воопшто не ми е грижа.

Нејзините деца Доналд Џуниор (42), Иванка (39) и Ерик (36) се чувствуваат добро, а нивната мајка едвај чека да ја напуштат Белата куќа.

– Мислам дека уживаа додека беа покрај Доналд и учествуваа во изборите, но сега е готово. Не сум сигурна какви им се плановите, но само сакам да продолжат со нормалните животи. Не со живот во Вашингтон, туку во Њујорк, или каде и да сакаат, но да водат нормални животи, порача таа.

Ивана прогнозираше дека ова би можело да биде крајот на политичката кариера на Трамп.

– Мислам дека нема избор. Мислам дека ќе замине во Палм Бич и ќе игра голф и ќе води нормален живот. Тоа е најдоброто што може да го направи. Тој мрази да губи, сигурна сум во тоа. Но, доколку изгубил – изгубил. Има доволно пари, доволно места на кои може да замине и да ужива во својот живот, изјави Ивана за крај.

Таа со Доналд беше во брак од 1977 до 1992 година.