Летувањето во Европа оваа година би можело да ве чини значително повеќе од самото сместување доколку не сте детално запознаени со строгите правила на однесување кои ги воведоа бројни популарни дестинации. Од казни за резервирање место на песокот до носење на костимите за капење, бреговите ширум Медитеранот воведоа комунален ред, а во таа политика активно и многу строго учествува и Хрватска.

За да се одбранат од последиците на масовниот туризам и да ја заштитат скапоцената животна средина, европските земји драстично ги зголемија локалните закони. Туристите кои ќе одлучат да ги игнорираат новите правила се соочуваат со одземање на личните работи и парични казни кои во екстремни ситуации можат да изнесуваат неверојатни 36 илјади евра. Во целата приказна за воведување туристички ред одамна се вклучија и крајбрежните бисери како Сплит, Дубровник и Хвар, во кои комуналните редари повеќе немаат нималку милост за непристојното однесување на гостите.

Казни за голотија во Хрватска и соседството

Хрватските дестинации одлучија да му стават крај на неприменото однесување на посетителите. Сплит, Дубровник и Хвар донесоа многу јасни закони за комунален ред според кои секој што шета низ старите улици со голо торзо или во костим за капење ризикува моментална парична казна до 150 евра. Но, се чини дека и тоа е само закон на хартија бидејќи никој всушност не ги казнува, па полуголите туристи на хрватските крајбрежни дестинации се редовна појава, пишува „ТПортал“.

Бројни медитерански градови ја делат истата политика на нулта толеранција кон разголените туристи. Во италијанскиот Соренто паричната санкција за оскудна облека надвор од плажите се искачува до 500 евра, додека на плажите во португалија, носењето костим за капење на градските плоштади може да резултира со казна од огромни 1.500 евра. Шпанските дестинации како Барселона и Палма де Мајорка исто така редовно наплатуваат околу 300 евра казна за сите кои влегуваат во продавници и ресторани без маица, а во француската Ница се плаќа до 38 евра за недозволено одење во топлес.

Одземање на крпите и астрономски казни за бучава

Една од најиритантните летни навики на туристите е ранобудното оставање крпи за бесплатно да се заземе најдоброто место покрај морето. Бројни хрватски градови и општини, од Макарската ривиера па сè до Кварнер, ги овластија комуналните редари во раните утрински часови буквално да ги исчистат плажите од ваквите „резервации“. Сите оставени крпи, подлоги и лежалки се собираат одвозуваат во комуналните складишта. Сопствениците кои ќе дојдат по своите работи се соочуваат со парични казни кои, во зависност од локалните одлуки на секоја поединечна општина, најчесто се движат од 60 па сè до 200 евра.

Слична е ситуацијата и во шпанскиот град Калпе, каде што истата навика би можела да ве чини точно 250 евра.

Италијанската Сардинија отиде чекор понатаму, па така на плажата Пелоса посетителите под крпата задолжително мора да имаат подлога за да однесуваат што е можно помалку песок со себе, во спротивно плаќаат 100 евра казна.

Грција, пак, на повеќе од 250 плажи целосно го забрани поставувањето комерцијални лежалки и чадори за сонце за да го зачува природниот изглед на брегот.

Строга хигиена и апсурдни правила за животните

Одредени држави применуваат исклучително строги закони кога е во прашање крајбрежната хигиена, па така шпанските градови Виго и Марбела наплатуваат 750 евра казна доколку комуналните редари ве фатат како мокрите во морето или на самиот песок. Истовремено, пушењето е целосно забрането на стотици плажи во Франција, Италија и на шпанските острови.

Што се однесува до домашните миленици, правилата се прецизно дефинирани ширум цела Европа, а тоа особено се однесува на Хрватска, каде на кучињата им е забранет пристапот до голем број места за капење за време на шпицот на летната сезона.

Ова се најдобрите плажи во Европа за одмор со деца

ФОТО | Најдобри нудистички плажи во Грција за несекојдневно летно бегство