Сериозни пропусти во безбедноста при работа утврдил Државниот инспекторат за труд на градилиштето во скопската населба Кисела Вода, каде загина 34-годишен работник од Крива Паланка, а тројца негови колеги беа повредени.

Иако сите ангажирани работници биле во работен однос кај подизведувачот, според наодите на Инспекторатот, не биле преземени основни мерки за безбедност.

„Од областа на Безбедност и здравје при работа утврдено е дека не биле преземени колективни мерки за заштита, односно не било направено подградување на ивиците на темелната јама или друг начин за заштита од обрушување на земјиштето, што е и причина за несреќата“, соопштија од Државниот инспекторат за труд.

Поради утврдените неправилности, изречена е усмена забрана за работа на градилиштето, која останува на сила сѐ додека не се отстранат причините за несреќата и не се обезбедат сите неопходни мерки за заштита на работниците. Од инвеститорот и изведувачот е побарано да ја достават целокупната документација поврзана со безбедноста и здравјето при работа.

Во понеделник инспекторите ќе одат на втор увид, а очекуваат во вторник да ја добијат и документацијата од фирмата изведувач „Компанија Јакимовски“ и од инвеститорот „НАР инвестмент“.

Во меѓувреме, Основното јавно обвинителство продолжува со истрагата за утврдување на околностите под кои се случила несреќата, а издадена е и наредба за обдукција на починатиот работник. Повредените лица, на возраст од 35 до 45 години, се хоспитализирани во Клиничкиот центар „Мајка Тереза“, каде нивната состојба се следи.

ФОТО+ВИДЕО | Еден загинат и тројца повредени градежни работници на градилиште во Кисела Вода

Сопственик на фирмата која е инвеститор е поранешниот градоначалник на општина Аеродром, Ивица Коневски.