Ким Кардашијан за првпат јавно објасни зошто фотографиите со Меган Маркл и принцот Хари, кои таа и нејзината мајка Крис Џенер ги објавија на Инстаграм по повод 70. роденден на Крис, подоцна беа избришани. Фотографиите исчезнаа од социјалните мрежи кратко по забавата, што веднаш предизвика бројни шпекулации, пишува „Пипл“.

Гостувајќи во поткастот на својата сестра Клои Кардашијан, „Khloe in Wonderland“, Ким детално зборуваше за ситуацијата.

„Всушност, сè беше целосно невино и токму тоа е најлудото во целата приказна. Мојата мајка и Меган се пријателки со години и навистина имаат прекрасен однос“, изјави Ким.

Таа објасни дека по забавата заедно ги разгледувале фотографиите и одбирале кои ќе ги објават.

„Ни рекоа дека е сосема во ред да ги објавиме“, додаде таа.

Според нејзините зборови, проблемот настанал поради моментот кога биле објавени фотографиите.

„Откако беа објавени, мислам дека сфатија дека се поклопило со Денот на сеќавањето во Велика Британија и не сакаа тој ден да бидат видени на роденденска забава. Иако фотографиите веќе беа објавени, подоцна ги отстранија. Потоа веројатно си рекоа: ’Леле, ова беше глупаво‘“, објасни Ким.

Денот на сеќавањето во Велика Британија се одбележува во чест на загинатите припадници на вооружените сили, а членовите на кралското семејство традиционално учествуваат во комеморации. Забавата за роденденот на Крис Џенер се одржала во сабота навечер, во пресрет на неделните свечености, вклучувајќи ја и комеморацијата.

По забавата со тема Џејмс Бонд, одржана во вилата на Џеф Безос и Лорен Санчез во Беверли Хилс, Крис и Ким на Инстаграм објавија фотографии со војводата и војвотката од Сасекс. Крис сподели фотографија на која позира со Меган и Хари, додека Ким објави фотографија на која е само со Меган. Двете фотографии подоцна беа отстранети.

Набргу се појави и друга верзија на приказната. Извор близок до Меган и Хари изјавил за „Пипл“ дека двојката наводно не дала дозвола за објавување на фотографиите направени на забавата. Според таа верзија, тие одбиле фотографиите да бидат споделени, поради што подоцна биле отстранети.