Холивудската актерка Деми Мур покажа поголема колекција на свечени тоалети на овогодинешниот Филмски фестивал во Кан, каде што беше и член на жирито, а секоја од нив, од пердувестиот „Гучи“, измамнички едноставниот на Том Браун, до тесниот на „Жакемус“ и класичната на „Нина Ричи“, предизвикаа многу реакции.

Но, врвот на модното изразување на американската актерка и врвот на реакциите се случија на премиерата на филмот „Хартиен тигар“ (Paper Tiger), кога Мур се појави во светло розова балска тоалета потпишана од брендот „Matières Fécales“ (Fecal Matter). Негови основачи се канадското авангардно дуо Хана Роуз Далтон и Стивен Раџ Баскаран. Името буквално значи „фекална материја“, а може да се преведе и колоквијално како измет или талог. Тие во мај првпат се претставија на Модната недела во Париз и за нив се зборуваше со денови.

Манекенките и манекените на модната ревија изгледаа речиси гротескно, се гушеа со бисерите, имаа банкноти залепени преку очите и покажуваа лузни од неуспешни пластични операции. Модната ревија беше замислена како „темна сатира на екстремно богатство и елитизам“, истражување на убавината, младоста и капитализмот преку „распаѓачка“ свечена облека.

Фустанот на Деми Мур во Кан е дел од колекцијата есен/зима 2026 наречена „Еден процент“. На прв поглед, балскиот фустан изгледа како врвно парче за Барбика со џиновска панделка. Меѓутоа, кога ќе се погледне одблиску, свилата е намерно искината, изгорена и исечена на рабовите. Заедно со фустанот, Мур носеше розови салонки со панделка, кои исто така беа изработени за неа во соработка со брендот „Matières Fécales“ и Кристија Лабутен. Модните критичари кои почнаа да дискутираат за нејзиниот стајлинг веднаш го поврзаа овој изглед со нејзината улога во хорор-сатирата „Супстанција“ (Substance), каде што игра ѕвезда опседната со екстремни и деструктивни стандарди за убавина.

Нејзиниот стилист Бред Горески објасни за „Харперс базар“ како и зошто актерката го вклучила овој фустан во својот гардеробер во Кан.

– Кога Мур и јас размислувавме за Кан, ѝ реков: „Види, она што чувствувам дека ти треба во моментов е шарено, оптимистично, живо, еден вид пенливо присуство на тепихот. Имаме доволно денови да направиме нешто возбудливо.“ – појаснил тој и додал дека Мур сакала да истражи некои понови дизајнери што не ги носела претходно.

– Ѝ испратив неколку линкови и таа ми врати снимка од тој розов фустан. Малку ме изненади, бидејќи никогаш не сме направиле фустан со целосна здолниште како тоа. Тоа не е нешто што инаку ја привлекуваше. Фустанот е направен со тој малку распаднат, изветвен ефект, но во исто време е многу скулптуриран и сладок. Тоа е комбинација од толку многу работи што мислам дека самата Мур ги отелотворува – рекол тој.

Откако успеал да обезбеди поправка за него, дури и жената што го шиела фустанот допатувала во Кан за финалните прилагодувања.

Но, Мур со овој избор на фустан им се спротивстави на организаторите. Таа не беше единствената, се разбира, но веројатно беше највидлива. Кан неодамна го заостри својот дрес код, па покрај големите торби и ранци и голотијата, забранети се и преголеми фустани, особено оние што се предолги кои се влечат по црвениот тепих. Причината е „ефикасност и пристојност“ бидејќи ваквите фустани „го нарушуваат правилниот тек на движење на гостите и го комплицираат седењето во театарот“.

Појавата на Деми Мур директно ги поби тие правила. Сепак, никој не ѝ забрани пристап на црвениот тепих. Туку напротив, модните аналитичари велат дека комбинацијата на авангардна симболика и врвен гламурозен настап на актерката би можела да ги охрабри другите познати личности да ја прифатат концептуалната мода на конзервативните сцени.

Деми Мур: Филмската индустрија не може да се бори против растот на вештачката интелигенција

ФОТО | Деми Мур ѝ пркоси на забраната на Канскиот фестивал за проѕирни модни изданија на најотмен начин

Денеска се доделува Златната палма во Кан — критичарите годинава немаат јасен фаворит