ФОТО+ВИДЕО | „Лего“ го претвори „Бакнежот“ на Густав Климт во ремек-дело од 4.000 коцки
„Лего“ Групацијата, во соработка со музејот Белведере во Виена, го претстави својот најголем сет од колекцијата „Уметност“, инспириран од едно од најпознатите дела на австрискиот сликар Густав Климт – „Бакнежот“, пишува „Метро“.
Препорачано
Комплетот се состои од дури 4.000 коцки и претставува тридимензионална интерпретација на ремек-делото што се чува во музејот Белведере. Посебно внимание привлекуваат златните Лего-елементи, слоевитите текстури и специјално украсените делови, кои верно ги доловуваат препознатливите орнаменти, богатите детали и препознатливиот стил на Климт.
View this post on Instagram
Главниот дизајнер на модели во Лего Групацијата, Милан Маџ, истакна дека претворањето на „Бакнежот“ во Лего-модел било еден од најголемите креативни предизвици.
„Најголемиот предизвик беше да ги пренесеме богатите текстури, златните тонови и ситните детали, а притоа да останеме верни на оригиналното уметничко дело. Со комбинација од златни елементи и специјално декорирани делови успеавме да создадеме искуство што ја слави убавината на ремек-делото на Климт“, изјавил Маџ.
Во развојот на сетот учествувале и стручњаци од музејот Белведере, каде што се чува оригиналната слика. Тие тесно соработувале со дизајнерите на „Лего“ за секој детаљ што поверно да биде пренесен во новата форма.
Кустоската за уметност од 19 и 20 век во музејот Белведере, Стефани Ауер, нагласи дека соработката била единствено искуство.
„Разговаравме за симболиката, орнаментите и уметничките техники на Климт, како и за тоа како тие да се преточат во Лего-коцки. Посебно внимание посветивме на композицијата и препознатливата рамнинска структура на сликата, за да се зачува духот на оригиналот“, рече Ауер.
Како дополнување на проектот, „Лего“ подготви и специјален поткаст во кој Милан Маџ и Стефани Ауер зборуваат за создавањето на сетот, уметничкото наследство на Климт и процесот на претворање на едно од најпознатите дела на модерната уметност во модел од коцки.
За полесно составување, љубителите на Лего ќе можат да ја користат и апликацијата „Лего Билдер“, која нуди интерактивни тридимензионални упатства и можност за следење на напредокот.
Сетот „Лего Уметност – Густав Климт: Бакнежот“ ќе биде достапен од 1 август 2026 година за членовите на програмата „Лего Инсајдерс“, а од 4 август ќе се најде во редовна продажба.
Со овој проект, Лего продолжува да ја проширува својата колекција посветена на уметноста, поврзувајќи го светот на креативното градење со ремек-дела од светското културно наследство.
