Од Северниот Пол до Монт Еверест, може да веруваме дека човекот го истражил секој дел од нашата планета. Сепак, тоа не е точно.

И денес постојат бројни места кои никогаш не биле темелно истражени. Од древни шуми до замрзнати планински врвови, овие локации ја будат љубопитноста и ја поттикнуваат човечката имагинација.

Некои останале недопрени поради верски и духовни причини, додека други се толку непристапни и сурови што луѓето сè уште не успеале целосно да ги прошетаат, пишува „Дејли мејл“.

Земја на Мери Берд, Антарктик

Сместена во Западен Антарктик, Земјата на Мери Берд е едно од ретките вистински подрачја на светот што не припаѓаат на ниту една држава. Оваа ледена област зафаќа околу 1,61 милион квадратни километри.

Научниците проценуваат дека дури 99,6 проценти од регионот остануваат недопрена дивина. Поради огромната површина и екстремните климатски услови, многу делови никогаш не биле детално истражени.

Суптропските шуми во Мјанмар

Овој шумски регион се простира на повеќе од 30.000 квадратни километри во планинскиот северен дел на Мјанмар, долж границите со Индија и Кина. Се смета за едно од последните вистински диви подрачја на Земјата.

Тоа е едно од најголемите зачувани шумски подрачја во Југоисточна Азија и дом на околу 6.000 растителни и животински видови, од кои многу не се среќаваат никаде на друго место во светот.

Областа отсекогаш била тешко пристапна и ретко населена со домородни заедници. Во текот на шеесеттите години од минатиот век, поради политичките судири во земјата, пристапот за истражувачите бил дополнително ограничен.

Кангкар Пунсум, Бутан

Со височина од 7.570 метри, Кангкар Пунсум е највисокиот неосвоен планински врв во светот.

Иако временските услови и непристапниот терен го прават искачувањето исклучително тешко, главната причина што врвот никогаш не бил освоен е неговото духовно значење. Жителите на Бутан веруваат дека на врвот живеат божества.

Во осумдесеттите години биле направени неколку обиди за искачување, но експедициите се повлекле од почит кон локалните верувања. Владата на Бутан во 1994 година забранила искачување над 6.000 метри, а од 2003 година планинарењето на оваа планина е целосно забрането.

Мачапучаре, Непал

Мачапучаре е света планина со два впечатливи врва што се издигнуваат на 6.993 метри во заштитеното подрачје Анапурна.

Според верувањата на народот Гурунг, планината е дом на богот Шива, поради што со векови останала речиси недопрена.

Во 1957 година британска експедиција добила дозвола за искачување, но застанала околу 150 метри под врвот, почитувајќи го ветувањето дадено на кралот на Непал дека никој нема да стапне на самиот врв. Оттогаш не се издадени нови дозволи за искачување.

Сума Ри, границата меѓу Пакистан и Кина

Врвовите Сума Ри и Сума Ри II, високи 7.312 и 7.302 метри, се дел од планината Скил Брум. Иако искачувањето не е официјално забрането, досега нема потврдено успешно освојување на овие врвови.

Планината се наоѓа во исклучително непристапно подрачје без патишта и планинарски патеки. Глечерите, длабоките ледени пукнатини и честите лавини дополнително ја намалуваат можноста за успешна експедиција.

Гакеловиот гребен, Арктички Океан

Длабочините на океаните кријат уште повеќе неистражени места отколку копното. Научниците проценуваат дека досега се мапирани само околу една четвртина од океанското дно, додека луѓето непосредно истражиле само мал дел од него.

Гакеловиот гребен е еден од најнепристапните делови на океанското дно. Станува збор за подводен вулкански планински венец долг околу 1.800 километри, кој се протега низ Евроазискиот басен во Арктичкиот Океан.

Се наоѓа на длабочина од 4.600 до 5.100 метри и, за разлика од Маријанскиот Ров, во текот на целата година е покриен со дебела ледена покривка, што го прави исклучително тежок за истражување.

Пештерата Шондонг, Виетнам

Шондонг, сместена околу 450 километри јужно од Ханој, е најголемата позната пештера во светот. Досега се мапирани околу 38,5 милиони кубни метри нејзина внатрешност.

И покрај децениите истражувања, спелеолозите и понатаму откриваат нови тунели и огромни подземни сали. Научниците сметаат дека бројни подземни реки и странични премини сè уште остануваат неоткриени.

Во пештерата има сталагмити високи до 70 метри, подземна шума, водопади, како и природни магла и облаци што се создаваат во нејзината огромна внатрешност.