Елиминацијата на Ѓоковиќ во корист на Рафа и Федерер, но не е добра за тенисот!
Шпанскиот стручњак подвлекува дека првиот светски рекет може да има проблеми поради ова на следниот турнир што го игра во Рим, Италија.
Тони Надал, вујкото и воедно поранешен тренер на Рафаел Надал, еден од најголемите ривали на Новак Ѓоковиќ, реагираше на дисквалификацијата на најдобриот тенисер во светот од овогодинешниот „УС Опен“ во Њујорк, САД.
Шпанецот е свесен дека Србинот немаше намера да повреди никого, но тој повторува дека правилата се јасни.
– Ѓоковиќ немаше намера да удри кого било. Постои правило кое вели дека доколку удрите судија, последицата е елиминација. Дополнителен проблем за Новак е што имаше удар во врат – рече Тони Надал за шпанските медиуми.
Ваквата дисквалификација оди во корист на најголемите ривали Рафаел Надал и Рожер Федерер, но според вујкото на Рафа истата во суштина не е добра за тенисот.
– Прв од тоа имаше корист Пабло Карењо, кој играше против него на овој меч и победи. Сите оние кои останаа на натпреварувањето доживуваат олеснување кога ќе падне главниот фаворит. Секако, од далеку има корист и за Федерер и за Надал, бидејќи Ѓоковиќ ќе остане без нов Грен слем. Но, реалноста е дека ова е болна ситуација за него и дека воопшто не е добра за тенисот – додава Тони Надал.
Шпанскиот стручњак подвлекува дека Ѓоковиќ може да има проблеми поради ова на следниот турнир што го игра во Рим, Италија.
– Да се биде дисквалификуван од голем турнир како прв рекет во светот е голем удар за моралот. Тој веќе се извини за тоа и тоа е добро. Претпоставувам дека тоа може да влијае на него во Рим, бидејќи турнирот е многу близу (14 септември). Повторно, има доволно време до Ролан Гарос и верувам дека дотогаш ќе се опорави од овој шок – се зборовите на поранешниот тренер на вториот светски рекет.
Токму на Ролан Гарос Новак треба да води голема борба за шампионската титула со Рафаел Надал.