Кога деновите се топли, ретко кој сака да ја вклучи рерната, а сепак сите сакаат освежителен десерт. Овој чискејк со грчки јогурт и кајсии е вистинското решение, лесен, кремаст и полн со овошен вкус.

Нежниот фил од јогурт и лимон совршено се вклопува со освежителниот прелив од кајсии, додека основата од бисквити ја дава потребната крцкавост. Идеална е за семејни собири, родендени или како освежување со попладневно кафе.

Состојки:

За основата:

– 250 г мелени бисквити
– 120 г путер

За филот:

– 150 г крем сирење
– 850 г грчки јогурт
– 15 г желатин
– 135 мл ладна вода
– 240 г шеќер во прав
– 180 мл слатка павлака
– 30 мл сок од лимон
– рендана кора од половина лимон

За преливот од кајсии:

– 400 г исчистени, зрели кајсии
– 40-50 г мед или 50 г шеќер (по вкус и сладоста на овошјето)
– 5 г желатин во прав
– 60 мл вода

Подготовка:

Мелените бисквити измешајте ги со растопениот путер. Добиената смеса ставете ја на дното на калапот, односно плехот, со дијаметар од 20 см обложен со хартија за печење. Ставете го во фрижидер додека го подготвувате филот.

Измешајте го желатинот со ладна вода и оставете го да набабри десетина минути. Потоа загревајте го нежно додека целосно не се растопи, но внимавајте да не зоврие.

Во голем сад, измешајте ги крем-сирењето, грчкиот јогурт, шеќерот во прав, сокот од лимон и ренданата кора од лимон. Додајте го растопениот желатин и добро измешајте.

Одделно изматете ја ладната слатка павлака во цврст шлаг, а потоа нежно вмешајте ја во филот. Смесата прелијте ја врз основата од бисквити и ставете ја во фрижидер да се стегне најмалку три часа.

Измијте ги кајсиите, извадете ги семките и исечете ги на помали парчиња. Ставете ги во тенџере и варете 5 до 7 минути на тивок оган, додека не омекнат и не испуштат сок.

Додајте мед или шеќер, па сè измешајте (изблендирајте) во мазно пире. Оставете да се излади.

Желатинот измешајте го со 60 мл ладна вода и оставете го да набабри десет минути. Потоа загревајте го нежно додека не се растопи целосно, но внимавајте да не зоврие.

Во млакото пире од кајсии вмешајте го растопениот желатин и добро соединете.

Бонус совет: Ако кајсиите се многу сочни, гответе ги уште една или две минути за да испари дел од течноста. На тој начин, мусот ќе биде поцврст и подобро ќе се сече заедно со чискејкот.

Кога филот од јогурт ќе се стегне, врз него внимателно распоредете го мусот од кајсии. Вратете ја тортата во фрижидер и оставете ја најмалку 3 часа, а идеално е преку ноќ.

Чискејкот сервирајте го добро изладен.