Петнаесет граѓани се повредени во силното невреме што попладнето го зафати Скопје. Деветмина се примени на Трауматологија, а шестмина во Универзитетската Клиника за хируршки болести „Св. Наум Охридски”.

Директорот на Клиниката за ТОАРИЛУЦ, проф. д-р Игор Мерџаноски изјави дека двајца луѓе имаат потешки повреди – една жена е со повреда на главата и таа е згрижена на Клиниката на неврохирургија, додека другата има скршена рака.

Шестемина повредени луѓе кои се примени на Клиниката за хируршки болести „Св. Наум Охридски”, како што изјави директорот, д-р Небојша Настов, имаат расеченици и набиеници и тие се третираат амбулантски.

Тројца од повредените по амбулантскиот преглед се пуштени дома, а тројца се во фаза на испитување.

„Сите се во стабилна состојба. Првично не оддаваат впечаток дека ќе бидат задржани на натамошно лекување. Еден пациент е повреден при пад на дрво и го закачиле гранките, еден е повреден од лим кој паднал од некој покрив, а еден е повредени од паднати керамиди“, додаде д-р Настов.

Директорот на Градската општа болница „8 Септември“, д-р Синиша Стојаноски, изјави дека кај нив не се примени повредени во невремето во Скопје, но дека ветрот предизвикал огромна материјална штета, најмногу на покривот.

„Треба да излезе проценител на терен и да направи официјален записник за штета од надлежните институции. Засега најголема штета имаме на кровот и кровната конструкција“, вели директорот на Градската општа болница „8 Септември“.

ВИДЕО | Дрво што падна за влакно промаши автомобил, невремето остави пустош и во Градскиот парк