Се продава парче од свадбената торта на принцот Чарлс и принцезата Дијана старо 40 години
Парче од свадбена торта на принцот и принцезата од Велс ќе се најде на аукција – 40 години од нивното судбоносно „да“, пренесува „Hello Magazine“.
На денешен ден се случи кралската венчавка, меѓу наследникот на британскиот престол и 20-годишната лејди Дијана Спенсер, на 29 јули 1981 година во лондонската катедрала Свети Павле.Но, нивната бајковита среќа не потраја долго. Тие се разделија 11 години подоцна, во 1992 година и официјално се разведоа во 1996 година.
Имено, едно големо парче торта со глазура и основа од марципан од една од 23-те официјални свадбени торти ѝ било дадено на Мојра Смит, член на домаќинството на мајката на кралицата Елизабета во Кларенс Хаус, која го зачува со прозирна фолија.
Таа парчето торта го чувала во стар калап за торта и залепила рачно изработена етикета на капакот на која напишала: „Внимателно со ова – свадбената торта на принцот Чарлс и принцезата Дијана“, на крај се потпишала и оставила датум.
Семејството Смит го продало парчето торта во 2008 година на колекционер, но парчето торта повторно се појави на аукција, што се совпадна со 40-годишнината од кралската венчавка.
Крис Албери, аукционер и висок проценител на аукциската куќа „Dominic Winter Auctioneers“ во Сиренсестер, Глостершир, во врска со ова рече: „Изгледа дека е во потполно иста добра состојба како и кога првично беше продадено, но ве советуваме да не го јадете“.