На денешен ден, 15 јули 1953 година, во Књажевац е родена Неда Арнериќ – актерка која повеќе од пет децении беше едно од најпрепознатливите лица на југословенската и српската кинематографија. Во кариера долга 53 години сними повеќе од 110 филмови, одигра десетици театарски улоги, освои највисоки актерски признанија и остави неизбришлива трага во филмската историја.

Пред камерите застана уште како 13-годишно девојче, кога режисерот Пуриша Ѓорѓевиќ ѝ ја довери улогата во филмот „Сон“, со што стана првата детска филмска ѕвезда во тогашна Југославија. Веќе до својата 18. година зад себе имаше десет филмови и главни улоги, а покрај домашните, почна да добива ангажмани и во странски продукции.

Во младоста паралелно посетуваше часови по балет и беше член на Детската драмска група на Радио Белград. На само 16 години се запиша на Академијата за театар, филм, радио и телевизија во Белград, но поради сè почестите снимања ја напушти. Подоцна дипломираше историја на уметност на Филозофскиот факултет во Белград, убедена дека образованието е важно без разлика на успешната кариера.

Нејзината природна убавина и харизма ја претворија во еден од симболите на југословенскиот филм во шеесеттите и седумдесеттите години, а публиката ја памети по филмовите „Вишња на Ташмајдан“, „Пладне“, „Исправи се, Делфина“, „Валтер го брани Сараево“, „Кој тоа таму пее“, „Три карти за Холивуд“ и бројни други. Играше и во италијански, француски и израелски продукции, а владееше повеќе странски јазици, што ѝ овозможи успешна меѓународна кариера.

Големите љубови и неостварената желба да стане мајка

Иако јавноста ја познаваше како филмска дива, приватниот живот на Неда Арнериќ беше исполнет со љубов, но и со тешки моменти.

Првиот брак го склучи со режисерот Дејан Караклајиќ, кого го запозна за време на снимањето на филмот „Ужичка република“. Подоцна беше во брак со легендарниот актер Раде Марковиќ, кој беше 32 години постар од неа. Нивната врска долго време беше една од најкоментираните на југословенската јавна сцена, но Арнериќ подоцна зборуваше дека токму покрај него научила да сака сериозна музика, литература, театар и природата.

Најголемата животна љубов ја пронајде во максилофацијалниот хирург Милорад Мештеровиќ. Се запознале во 1981 година, а нивниот брак траеше повеќе од три децении. За него знаеше да каже дека ѝ бил сопруг, пријател и најголема поддршка во животот.

Иако силно посакувале семејство, никогаш не добија деца. Подоцна откри дека размислувале и за посвојување, но се откажале поради долгата и сложена процедура. Во едно интервју искрено призна дека тоа е една од најголемите неостварени желби во нејзиниот живот.

Последните години и наследството што го остави

Покрај актерството, Арнериќ извесен период беше активна и во политиката. Во 1996 година се приклучи на Демократската партија, а од 2000 до 2004 година беше пратеничка во Народното собрание на Србија. Во Белград ја водеше и галеријата „Атриум“, а предаваше и јавен настап.

За своите актерски достигнувања ги доби највисоките признанија, меѓу кои „Златна арена“ и „Сребрена арена“ на Филмскиот фестивал во Пула, како и престижната награда „Павле Вуисиќ“ за животно дело.

Во последните години од животот се соочи со здравствени и лични предизвици, а најтешко ја поднесе смртта на својот сопруг Милорад Мештеровиќ, кој почина во јануари 2019 година. Помалку од една година подоцна, на 10 јануари 2020 година, почина и Неда Арнериќ, на 66-годишна возраст.

И денес, шест години по нејзината смрт, останува запаметена како една од најголемите актерки на овие простори.

Љубовниот живот на Неда Арнериќ: Актерката се мажеше трипати, а јавноста ја осуди за љубовта со 32 години постариот сопруг