Градежната компанија „Џови компани“, во сопственост на Ацо Божинов, таткото на градоначалникот на Ново Село, Ѓорѓе Божинов, добива милионски договори за јавни набавки, но во соседните општини Струмица и Босилово, пишува „Фактор“.

Во официјалната биографија на синот Божинов е наведено дека и самиот тој, пред да стане градоначалник, осум години бил менаџер во семејната градежна фирма „Џови компани“.

На 4 јуни е објавен најголемиот договор со Општина Босилово кој досега го има склучено фирмата, во вредност од околу 750.000 евра за „Изградба на фекална канализација во Моноспитово (втора фаза)“. Претходно, на 15 април, компанијата за нискоградба била избрана од Општина Струмица за „Изведба на втор слој асфалт на улици по програми за 2026 година“, за што добила 300.000 евра, пишува „Фактор“.

Во февруари Струмица ѝ доделила на „Џови компани“ и тендер за „Изведба на основен сообраќаен проект за режим на сообраќај на нов градски пазар“ од 550.000 евра. Сепак, најголемиот тендер фирмата го добила во август 2024 — за сума поголема од 4,5 милиони евра бил потпишан договор за изградба на нов градски пазар во Струмица, кога градоначалник бил Костадин Костадинов.

Ѓорѓе Божинов е градоначалник од редовите на ВМРО-ДПМНЕ, како и неговите колеги од општините Струмица и Босилово, Петар Јанков и Ристо Манчев. „Џови компани“ лани имала приходи од околу 120 милиони денари (нешто помалку од два милиони евра), а годината ја завршила со 50-тина вработени, пишува „Фактор“.

Жалбата за притворот на Стефан Богоев сè уште не е стигната до Кривичниот совет, се чека мислење од обвинителот