Нов лек против Алцхајмерова болест би можел да го спречи развојот на деменција пред да се појават првите симптоми, а истражувањата сугерираат дека може да ги отстрани токсичните наслаги од мозокот за само три месеци. 

Во новото истражување, лекот тронтинемаб ќе го примаат околу 1.600 луѓе кои немаат проблеми со меморијата, но имаат висок ризик од развој на болеста, и тоа еднаш месечно во форма на инфузија, со цел да се утврди дали може да го спречи појавувањето на симптомите.

Научниците оценуваат дека ова големо клиничко испитување би можело да претставува „пресвртница“, отворајќи ја можноста на луѓе на средна возраст рутински да се нудат своевидните „статини за мозокот“ .

Студијата од третата фаза, последната етапа од тестирањето пред да се одобри нов лек, ќе користи анализа на примероци од крвта за да се утврди кои луѓе имаат најголема корист од лековите.

Во истражувањето ќе бидат вклучени луѓе постари од 55 години кои немаат когнитивно оштетување, но имаат биомаркери поврзани со развојот на Алцхајмерова болест.

Тронтинемаб, кој го произведува швајцарската фармацевтска компанија „Рош“, делува така што ги отстранува лепливите амилоидни плаки што се таложат во мозокот и доведуваат до развој на оваа дегенеративна болест.

Спречување на настанување на симптомите на деменција

Истражувањето претставено на Меѓународната конференција на Здружението за Алцхајмерова болест во Лондон покажало дека тестовите на крвта можат да идентификуваат здрави постари лица кои се имаат најголем ризик од развој на болеста.

Д-р Марија Кариљо, главен научна директорка на Здружението за Алцхајмерова болест, вели дека иднината на лекувањето е во насочувањето на терапијата во најраните фази на болеста, вклучително и нејзината тивка фаза, пред да се појават проблеми со меморијата.

„Токму тогаш терапиите можат да донесат најголема корист – можеби дури и да спречат луѓето некогаш да развијат симптоми на деменција“, истакнала д-р Кариљо, пренесува британски „Телеграф“.

Податоците покажуваат дека осум од десет лица со позитивен резултат од тестот имаат речиси осум од десет шанси да развијат когнитивно оштетување во следните десет години.

Тронтинемаб претставува нова генерација лекови во споредба со леканемаб и донанемаб, првите лекови за Алцхајмерова болест за кои е докажано дека го забавуваат напредувањето на болеста.

Развиен е така што поефикасно стигнува до мозокот од своите претходници и, според досегашните податоци, предизвикува помалку несакани ефекти, поради што може да бара помалку следење на пациентите, што дополнително би ги намалило трошоците за лекување.

Всушност, новите истражувања покажуваат дека тронтинемаб ги чисти амилоидните плаки значително побрзо од постојните терапии.

Наслагите во мозокот исчезнуваат по три инфузии

Научниците користеле податоци од 178 пациенти кои ја примале терапијата, како и 477 снимки на мозокот, за да ги моделираат резултатите што лекот би можел да ги постигне во поголемо клиничко испитување.

Тронтинемаб се прима преку инфузија во болница, а анализата покажува дека кај пациентите што примаат најголема доза, мозокот би можел да биде целосно исчистен од амилоидните наслаги поврзани со деменција по три месечни инфузии.

Податоците покажуваат дека дополнителните дози на секои три месеци се доволни за да се одржи нивото на амилоидни плаки ниско во текот на следните 18 месеци.

Сепак, допрва треба да се потврди дека способноста на лекот да ги отстранува плаките навистина го спречува когнитивното пропаѓање, како што е покажано кај претходните лекови за Алцхајмерова болест.

Утврдено е дека леканемаб и донанемаб го забавиле когнитивниот пад кај пациентите со симптоми за 27, односно 35 отсто.

Крвен тест со точност до 95 отсто

Во превентивната студија, наречена PrevenTRON, ќе учествуваат когнитивно здрави доброволци на возраст од 55 до 80 години од повеќе земји низ целиот свет, вклучувајќи ја и Велика Британија.

Сите учесници ќе имаат зголемено ниво на биомаркерот p-tau217 во крвта, кој е поврзан со Алцхајмеровата болест.

Помладите учесници ќе мора да имаат и дополнителни генетски или семејни фактори на ризик за да бидат вклучени во истражувањето.

Резултатите претставени на конференцијата покажале дека одредувањето на нивото на p-tau217 во крвта овозможува предвидување на Алцхајмеровата болест со точност до 95 отсто.

Д-р Рејчел Бакли, професорка по неврологија на Медицинскиот факултет на Универзитетот Харвард, оценила дека новата генерација терапии што во моментот се испитуваат е „извонредна“ и изразила надеж дека во следните две години ќе се потврди нивната ефикасност кај луѓе кои сè уште немаат когнитивно оштетување.

„Ако овие испитувања се успешни, правилата на играта ќе се променат“, рекла таа на настанот организиран од Движењето на жени за борба против Алцхајмеровата болест.