Принцовите Вилијам и Хари и понатаму немаат никаков контакт, иако неодамнешната средба на војводата од Сасекс со кралот Чарлс Трети донела извесно подобрување во односот меѓу таткото и синот.

Извор близок до кралското семејство за магазинот „Пипл“ изјавил дека односот меѓу браќата е „целосно нарушен“ и дека засега нема никаков напредок кон помирување.

„Искрено, мислев дека ситуацијата досега барем малку ќе се смири. Но, нема никакво придвижување, особено од страната на Вилијам. Нема контакт“, изјавил извор кој наводно ги познава двајцата браќа.

Вилијам и Хари на 7 јули престојувале на само дваесетина километри еден од друг во Лондон, но, според британските медиуми, воопшто не се очекувало да се сретнат.

Односот меѓу браќата значително се влоши откако Хари и неговата сопруга Меган Маркл се повлекоа од кралските должности во 2020 година. Јазот дополнително се продлабочи по објавувањето на мемоарите на Хари, „Резерва“, во 2023 година, во кои тој изнесе низа детали за животот во британското кралско семејство.

За време на неодамнешната посета на Велика Британија, Хари сепак остварил долгоочекувана средба со својот татко. На средбата присуствувале и Меган, принцот Арчи и принцезата Лилибет, кои го виделе својот дедо првпат по четири години. Средбата се одржала во резиденцијата Хајгроув, а присуствувала и кралицата Камила.

Извор близок до Хари тврди дека неговиот однос со кралот сега е подобар, но затегнатоста со Вилијам останува непроменета.

Расколот меѓу браќата се одразил и врз нивните деца. Принцот Џорџ, принцезата Шарлот и принцот Луис наводно немаат близок однос со своите братучеди Арчи и Лилибет, кои живеат во Калифорнија.

Хари и претходно јавно изјавуваше дека сака помирување со своето семејство и дека не гледа смисла во продолжувањето на конфликтите.

Сепак, засега нема најава дека тој и Вилијам ќе се сретнат или ќе започнат разговори за обновување на нивниот некогаш близок однос.

ФОТО | Црвенокосата принцеза Лилибет наполни 5 години — Меган Маркл сподели досега невидени семејни моменти