Многу мажи вложуваат време и енергија во изгледот, заработката или оставањето силен прв впечаток, убедени дека токму тоа е пресудно за привлекување партнерка. Сепак, најновите истражувања покажуваат дека жените најмногу ценат сосема поинакви квалитети, пишува „Вајс“.

Истражување спроведено во 2025 година покажало дека младите мажи во голема мера погрешно проценуваат што жените бараат кај потенцијален партнер. Дури половина од анкетираните мажи сметале дека физичкиот изглед е најважен, а 39 проценти верувале дека финансиската состојба е клучниот фактор.

Од друга страна, жените на врвот на листата ги ставиле смислата за хумор со 60 проценти и добрината со 53 проценти, што покажува дека емоционалната поврзаност и карактерот имаат многу поголемо значење од изгледот или материјалниот статус.

Експертите кои со години ги проучуваат љубовните односи издвојуваат пет особини што жените најчесто ги сметаат за привлечни.

1. Добрината е многу поважна отколку што мислат повеќето мажи

Иако многумина ја потценуваат, добрината игра важна улога и во првичната привлечност и во долгорочното задоволство од врската.

Истражување објавено во научно списание за еволутивна психологија, во кое биле анализирани 148 хетеросексуални парови, покажало дека жените почесто ги доживуваат љубезните мажи како поинтелигентни, додека лутите и груби мажи ги оценуваат како помалку интелигентни. Тоа влијаело и врз задоволството на двајцата партнери од врската.

Експертката за односи Бабита Спинели истакнува дека маж кој знае да покаже разбирање и сочувство кон чувствата на партнерката создава подлабока поврзаност и меѓусебна доверба.

2. Самодоверба без потреба постојано да се докажува

Самодовербата е привлечна, но само кога е природна и ненаметлива.

Советничката за љубовни односи Џејми Дејт вели дека жените најмногу ги привлекуваат мажи кои се сигурни во себе без потреба да бидат најгласни или постојано да бидат во центарот на вниманието.

„Не мора да бидете најгласниот човек во просторијата. Доволно е луѓето да почувствуваат дека знаете кои сте и што носите со себе“, вели таа.

Според Спинели, искрената самодоверба покажува дека мажот е способен да се справува со предизвици и да биде поддршка, наместо дополнителен извор на проблеми.

3. Смислата за хумор секогаш остава силен впечаток

Способноста да се насмее партнерката речиси секогаш е меѓу најпосакуваните особини.

Професорот Џефри Хол, кој ги истражува меѓучовечките односи, утврдил дека заедничката смеа придонесува за создавање посилна и потрајна врска.

Џејми Дејт нагласува дека не е потребно мажот да биде професионален комичар.

„Не мора постојано да раскажувате шеги, но ако умеете искрено да нè насмеете, тоа е навистина привлечно. Особено ако знаете да се насмеете и на сопствените грешки“, вели таа.

Сепак, предупредува дека постојаното омаловажување на себеси не остава добар впечаток.

4. Амбиција и јасна животна насока

Жените не ги привлекува само успешната кариера, туку и желбата за личен напредок.

Според Џејми Дејт, важно е мажот да има цели кон кои се стреми, наместо пасивно да минува низ животот.

И Бабита Спинели смета дека чувството за цел и визија е особено привлечно за жени кои и самите имаат јасни планови и сакаат партнер што ќе ги разбира и ќе ги поддржува нивните амбиции.

5. Емоционалната достапност е клучна

Клиничката сексолог Џенифер Гансалус вели дека една од најчестите желби што ги слуша од жените е партнерот да биде емоционално присутен и подготвен за искрена поврзаност.

„Кога постои поврзаност меѓу срцата, тогаш на жените многу полесно им е да се отворат и во интимна смисла“, објаснува таа.

Според експертката, чувството на сигурност не се создава со големи романтични гестови, туку со постојана поддршка, искреност и доследност во однесувањето.

Истражување открива: Поинтелигентните мажи се подобри партнери и поретко неверни