Норвешка екипа за екстремни спортови го претвори нестабилниот арктички леден ѕид, висок повеќе од 20 метри, во најнеобичната платформа за „скок на смртта“ досега. Двајца екстремни спортисти го извеле она што го нарекуваат прв ваков потфат во светот – скок во дисциплината позната како „додсинг“, односно „скок на смртта“, среде ледената дивина на Гренланд, пренесува српски „Телеграф“.

Спектакуларниот потфат го извела познатата норвешка екипа за екстремни спортови „00Nation“. За својот најголем предизвик досега, членовите отпатувале длабоко во Арктикот во потрага по совршена платформа за скокање, недопрена, нестабилна и постојано променлива ледена карпа што се издигнува над речиси замрзнатите поларни води.

„Се наоѓаме на Гренланд“, изјавил еден од членовите на екипата.

„Овде има ледени брегови. Навистина сум нервозен поради овој проект. Така и треба да биде. Тоа ве тера да останете фокусирани и подготвени. Време е да напишеме историја. Ова никој досега не го направил“, додал тој.

Додека повеќето љубители на сурфањето ги набљудуваат огромните глечери на Гренланд од сосема поинаква перспектива, некои трагачи по ретки бранови чекаат покрај брегот да се откинат огромни парчиња мраз и да паднат во морето. Токму тогаш создадените силни бранови им овозможуваат да сурфаат на нив.

Дисциплина создадена во 1972 година

Но, екипата „00Nation“ целосно го променила тој пристап и опасната карпа од активен глечер ја искористила како платформа за скок со исклучително висок ризик.

Наместо да чекаат бранови создадени од уривањето на мразот, тие се впуштиле во дисциплината „додсинг“, која во светот е позната и како „скок на смртта“.

Овој спорт се појавил во 1972 година на отворениот базенски комплекс Фрогнербадет во Осло, Норвешка. Го измислиле млади луѓе како забавен начин да ја тестираат својата храброст со скокање од кула висока 10 метри.

Од локална забава до светски феномен

Правилата на правилно изведениот „скок на смртта“ се едноставни, но застрашувачки.

Скокачите се фрлаат од високи платформи или карпи и за време на падот го држат телото целосно испружено, хоризонтално, во форма на буквата „Икс“. Од страна изгледа како да ќе удрат директно со стомакот во водата.

Во последниот момент пред допирот со површината, скокачот мора да заземе цврст и правилен став за да го ублажи ударот со рацете, нозете или колената.

Она што започнало како локална норвешка забава денес прераснало во популарен светски феномен. Со поддршка од Меѓународната федерација за нуркање, овој спорт денес има светска турнеја, полни трибини и милиони прегледи на интернет.

Сепак, изведувањето на оваа техника во контролирани услови, од базени и стабилни платформи, е сосема различно од скокање од подвижен 20-метарски арктички леден ѕид.

Токму затоа овој потфат на „00Nation“ се смета за еден од најекстремните моменти во историјата на овој спорт.

„Неверојатно добро чувство“, изјавиле спортистите по завршувањето на историскиот скок.

Разговор со Бети Котовчевска: Македонката која се капе во студени води, личен рекорд ѝ е минус 33 степени