Семејството на Тоше Проески јавно се огласи откако на платформата „Ивентим Хрватска“ беше објавена информација за концерт во чест на македонската музичка ѕвезда во Сплит, под наслов „Тоше засекогаш – музика која живее“ (Toše Forever – Glazba Koja Živi).

Концертот навистина е понуден во продажба преку „Ивентим“, но семејството тврди дека нема никаква поврзаност со него.

Во соопштението, објавено од сестрата на Тоше, Дора Проеска, се наведува дека информациите поврзани со концертот не се точни.

„Јавно и недвосмислено сакаме да ве известиме дека оваа информација не е точна. Нема да настапат Кристијан, ниту придружниот бенд на Тоше. Организаторите немаат ниту службена дозвола од нас за негово одржување, а ние сме единствените носители на правата“, стои во објавата.

Семејството нагласува дека секој искрен настан организиран во чест на Тоше Проески е доказ дека неговата музика и дело продолжуваат да живеат, но додава дека нема да дозволи, како што наведуваат, „отворена манипулација со неговото име и неговата публика“.

Во пораката упатена до обожавателите, тие апелираат да не наседнуваат на, како што велат, „невистини и комерцијални манипулации што си играат со емоциите на сите што го сакаат Тоше Проески“.

„Малечок бев и уште не знаев дека плачат и возрасни“: Владо Јаневски три децении го пишуваше она што сите го чувствувавме