Специјалниот преставник на претседателот на САД за разговорите помеѓу Косово и Србија, Ричард Гренел, во интервју за косовската телевизија Т7, изјави дека премиерот на Косово, Албин Курти, му ветил дека ќе ја отстрани таксата за српските производи.

– Тој ме погледна во очи и рече дека ќе ја отстрани таксата. За нас нема смисла да се водат политики кои носат штета на економијата, политики кои не дозволуваат бизнисите да се движат напред и да се отворат нови работни места. Ова им носи штети на најмладите кои сакаат работни места, и кога политиката ѝ носи штета на економијата, не треба да се очекува од нас, САД, да продолжиме да даваме поддршка на политиките кои им носат штета на луѓето – изјави Гренел за Т7.

Гренел посочи дека лично претседателот на САД, Доналд Трамп, побарал од него да помогне за да се поттикне економијата во Косово и Србија, со цел да се отворат нови работни места за младите.

Гренел исто така рече дека никогаш нема разговарано со претседателот на Косово, Хашим Тачи и со претседателот на Србија, Александар Вучиќ за размена на територии.

– Никогаш. Никогаш во мое присуство не е отворено тоа како прашање, и како што реков, ова не е нешто што за што сум разговарал. И порано кажав. Пишував и на Твитер, давав и изјави за медиумите. Не е првпат да кажеме јасно дека се работи за шпекулации, и само толку – додаде Гренел.

Прашан дали за него размената на териториите е добра опција, Гренел рече дека тој лично не ја гледа таа можност како реална опција.