Македонски камионџија уапсен во Србија — удрил во возач на Брза помош, кој заврши тешко повреден
Српската полиција денеска уапси државјанин на Македонија, кој со камион удрил во возач на Брза помош, објави „Нова“.
Препорачано
Според информациите од Полициската управа во Лесковац, тој бил пронајден и приведен откако со камионот удрил во возачот на возилото на Брза помош на лентата за принудно запирање кај Грделица. На осомничениот му било одредено задржување до 48 часа.
Несреќата се случила вчера попладне кај Грделица, кога се расипало возилото на Брза помош кое превезувало 10-годишно момче од Врање кон Ниш.
Возачот излегол од возилото за да го отстрани дефектот, кога во него налетал камион.
Според досегашните информации, камионот удрил во отворената врата на возилото, а вратата го удрила возачот.
Тој паднал и си ја удрил главата во бетон, по што бил пренесен во Универзитетскиот клинички центар во Ниш со тешки повреди.
Докторка која случајно наишла на местото на несреќата го зела момчето, за кое постоело сомнение дека има воспаление на слепото црево, и го однела со својот автомобил до Ниш.
