Продолжува палењето на диви депонии- казни за сторителите НЕМА
Чад од запалена мини депонија во Свиларе, општина Сарај вчеравечер го отежнуваше дишењето низ општините Сарај, Ѓорче Петров и Карпош. По пријава на граѓани, инспекторите излегле на терен, но казна не е изрена бидејќи, како што се соопштува, инспекторите не затекнале сторител на локацијата каде што бил пожарот кој бил изгаснат околу 20:20 часот.
Од Општина Карпош пред три дена најавија дека ќе има засилени контроли, откако граѓани реагираа за чад и миризба, во населените места Нерези, Тафталиџе 2, Влае и Карпош 4.
Градоначалникот на Општина Карпош, Стефан Богоев, во вторникот рече дека се засилени инспекциските контроли и потенцираше дека заштитата на животната средина и околина и во иднина ќе биде еден од главните приоритети на локалната самоуправа, во текот на целата година, а не само во критичните зимски месеци, кога загадувањето е најголемо на територијата на Градот Скопје, и низ целата земја.
Општинските власти потсетуваат дека дежурниот број на кој може да се јавуваат граѓани и да пријавуваат локации од каде што доаѓа непријатна миризба и чад од запалено е 078/ 257 640.