Суд во Јужна Кореја денеска го осуди поранешниот претседател Јун Сук Јеол на 18 месеци затвор, условно на три години, откако го прогласи за виновен за кршење на изборниот закон со давање лажни изјави за време на неговата претседателска кампања во 2022 година, јави Ројтерс.

Пресудата, доколку се потврди по жалба, би можела да ја принуди партијата на Јун да врати околу 27 милиони долари, или 39,7 милијарди јужнокорејски вони, што ги доби од Националната изборна комисија по неговата победа на претседателските избори.

Централниот окружен суд во Сеул утврди дека Јун дал лажни информации двапати за време на кампањата, помеѓу декември 2021 и јануари 2022 година.

„Кога кандидатот лично открива лажни информации на јавни настани со големо влијание, како што се дебати и интервјуа, влијанието врз донесувањето одлуки на гласачите е многу значајно“, се вели во пресудата на судот.

Обвинителите побараа двегодишна затворска казна, додека Јун, кој негираше какво било кривично дело, планира да поднесе жалба на пресудата, изјави неговиот правен советник.

Според изборниот закон на Јужна Кореја, политичките партии добиваат владино финансирање за трошоци за кампањата ако нивниот претседателски кандидат победи или добие најмалку 15 проценти од гласовите.

Доколку кандидатот последователно биде осуден на затворска казна или казнет со најмалку еден милион јужнокорејски вони, партијата мора да ги врати примените средства.