Откако деновиве се дозна дека Владата позајмила седум милиони евра од државната компанија Македонска навигација, премиерот Христијан Мицкоски денеска призна дека парите, кои Владата ги позајмила и од други државни претпријатија, ќе се користат за отплата на кредит.

Македонска навигација е државно акционерско друштво за контрола на летањето и таа троши пари кои ги собира и распределува паневропската организација Еуроконтрол, па ова отвори прашања за тоа дали М-Нав воопшто смее да ѝ позајмува пари на државата. Одговарајќи на новинарско прашање за намената на невообичаената позајмица, Мицкоски откри дека не била само таа од М-Нав.

„Не се само од МНАВ, таму имаме средства и од Лотарија, МЕПСО и сопствени средства на ЈПДП. Средствата ќе бидат искористени за враќање на кредит кон кинеската банка за автопатите и истите тие средства во август ќе им бидат вратени на компаниите“, рече Мицкоски.

Тој нагласи дека станува збор за постапка која и претходно била применувана.

„Се прави вообичаена процедура што многупати во минатото се правела. Во август тие средства ќе бидат вратени и кај М-Нав, и кај Лотарија и кај МЕПСО“, изјави премиерот.

Владата позајмила седум милиони евра од Македонска навигација