Од црквата „Свети Петар и Павле“ во Горно Лисиче попладне ќе тргнат 40-тина коњаници кои на 2 август треба да пристигнат во Крушево на одбележувањето на големиот празник Илинден.

Меѓу учесниците на 48. традиционален Илиденски коњички марш има и пет девојки. Тие на 31 јули ќе се спојат со учесниците од Свети Николе, Кичево и Битола.

Општина Аеродром ги поканува граѓаните да присуствуваат на свеченото испраќање на учесниците на коњичкиот марш.

„На 31 јули, коњаниците од Горно Лисиче ќе се обединат со учесниците од Свети Николе, Кичево и Битола, испраќајќи силна порака за единство, почитување на традицијата и зачувување на македонското историско наследство“ информира прес-службата на Општина Аеродром.

Традиционалниот Илинденски коњички марш се одржува секоја година во пресрет на одбележувањето на големиот државен празник Илинден во организација на Здружението на граѓани „Илинденски марш 1978“.