Невремето кое минатата недела го зафати Скопје оштетило и еден ер-трактор со што сега Дирекцијата за заштита и спасување останува со два ер-трактори. Според директорот на Дирекцијата за заштита и спасување Стојанче Ангелов фирмата што ги сервисира авионите е контактирана и побарано е да испратат нивни механичари.

– Штетата можеби не е голема, но тој сега е надвор од употреба. Стапивме во контакт со фирмата која е задолжена за сервис „Титан“ и побаравме најбрзо што може да испратат механичари. Јас очекувам дека и нашите механичари ќе може да се справат со овој предизвик, но правилата во воздухопловството се многу строги и налагаат да дојде прво нивна екипа тука. Така што во наредните денови третиот ер-трактор ќе го немаме на располагање, но тука се двата полициски хеликоптери и еден армиски хеликоптер, изјави Ангелов за „Сител“.