Израел сè повеќе ангажира странски агенти за да го зајакне своето влијание во Соединетите Американски Држави, наместо да се потпира на традиционални сојузници, како што е Американско-израелскиот комитет за јавни работи (AIPAC). Ова е главниот заклучок од новата студија на Институтот Квинси, објавена минатиот петок, со наслов „Осмиот фронт: Внатре во кампањата за влијание од милијарда долари на Израел“.

Автор на студијата е Ник Кливленд-Стаут, истражувач во Институтот Квинси за одговорно владеење.

Според анализата, Израел од 2023 година инвестирал повеќе од една милијарда долари во јавна дипломатија. Од таа сума, повеќе од 100 милиони долари биле потрошени за лобистички активности во САД, пријавени според Законот за регистрација на странски агенти (FARA).

Според авторот, овие средства би можеле да го направат Израел земја со најголеми трошоци за лобирање регистрирано според FARA во текот на оваа година.

На Израел му се заканува сегрегација меѓу мажи и жени?

Нови методи на лобирање

Седумнаесет компании биле регистрирани за застапување на израелските интереси во периодот од 2024 до 2025 година. Меѓу нив е и компанијата Clock Tower X, во сопственост на Бред Парскејл, на која ѝ бил доделен договор вреден 46,5 милиони долари.

Компанијата, според студијата, открила дека работи на влијание врз одговорите на чет-ботовите со вештачка интелигенција, преку внесување произраелска содржина во податоците што се користат за обука на големи јазични модели преку мрежа од веб-страници.

Документите поднесени според FARA, исто така, покажуваат дека Израел финансирал кампањи со инфлуенсери и масовни текстуални пораки.

Како пример, во студијата се наведува дека 161.000 долари му биле исплатени на Јоав Дејвис, креатор на профилот на Инстаграм „Евреи од Њујорк“, а 900.000 долари на Bridges Partners за ангажирање повеќе од десет инфлуенсери. Во извештајот се тврди дека ниту еден од нив не бил регистриран како странски агент.

Таргетирање на одредени групи

Голем дел од кампањата, според студијата, е координиран од Havas Media, која ангажирала седум подизведувачи регистрирани според FARA од 2024 година. Меѓу нив се агенцијата за односи со јавноста SKDK и Bridges Partners.

Израел гради огромен песочен ѕид за да ја подели Газа

Активностите биле насочени кон групи кај кои, според анализата, се намалува поддршката за Израел, како што се младите Американци, евангелистите и конзервативците.

Во септември 2025 година, Havas потпишала договор вреден 3,2 милиони долари со организацијата „Show Faith by Works“. Целта, според студијата, била спроведување кампања за „геооградување“, односно таргетирање на верници во американски цркви со произраелски реклами.

Промена на тактиките пред посетата на Вашингтон

Зголемените лобистички активности доаѓаат во период кога Израел се соочува со зголемени критики во САД, вклучително и од дел од членовите на Конгресот и потпретседателот Џеј Ди Венс.

Во исто време, се очекува израелскиот премиер Бенјамин Нетанјаху следната недела да го посети Вашингтон, каде што треба да разговара со претседателот Доналд Трамп.

„Новите израелски тактики го менуваат пејзажот на влијание во Америка, но досега се покажуваат како недоволни за да го спречат падот на јавната поддршка предизвикан од длабоко непопуларните израелски политики“, заклучува авторот на студијата Ник Кливленд-Стаут.