Ѓоковиќ и Надал за титулата на „Ролан Гарос“ (ВИДЕО)
Најдобриот тенисер во светот успеа после скоро четири часа игра да го елиминира петтиот носител на „Ролан Гарос“, Стефанос Циципас.
Новак Ѓоковиќ ги освои првите два сета доста убедливо со 6:3 и 6:2, а беше и многу блиску со максимален резултат да го добие мечот.
Во третиот српскиот ас стекна брејк предност, поведе со 5:4 и сервираше за победа, но после една судиска опомена поради пречекорување на времето за сервирање, тој буквално како да застана во играта.
A fifth final in Paris!
In just over four hours, @DjokerNole survives Stefanos Tsitsipas 6-3 6-2 5-7 4-6 6-1 to earn the right to play for a second title at #RolandGarros pic.twitter.com/FxF2jZ11DX
— Roland-Garros (@rolandgarros) October 9, 2020
Наместо рутински триумф, му дозволи на Гркот да ги добие дури наредните пет гема и не само што го доби третиот сет со 7:5, веќе и на почетокот од четвртиот сет имаше предност од 2:0.
Полека се враќаше Ѓоковиќ во својата игра, веднаш врати брејк и беше многу подобар на теренот, иако доаѓаше до нови брејк топки во секој сервис-гем на Циципас, многу лесно и ги пропушташе и му даваше сè поголема надеж на младиот грчки натпреварувач дека може да направи чудесен пресврт.
Особено кога во 10 гем од четвртиот сет Ѓоковиќ загуби гем на свој сервис што значеше влегување во решавачки петти сет. Но, сето време првиот светски рекет делуваше мирно, самоуверено и тоа го потврди во наредниот период, дозволувајќи му само еден гем на противникот (6:1) за конечни 3:2 во сетови.
Како што и се предвидуваше пред стартот на турнирот во Париз, во големото финале в недела (15.00 часот) Ѓоковиќ ќе ги одмери силите против Рафаел Надал кој претходно го елиминираше Диего Шварцман од Аргентина. Тоа ќе биде 56 меѓусебен меч помеѓу Рафа и Ноле, Србинот има три победи повеќе (29:26).
Шпанецот ќе ја брка севкупно 13 титула на овој грен слем, а Ноле ќе атакува на само вториот трофеј. В сабота (15.00 часот) во женското финале Ига Швјонтек од Полска ќе игра против Американката Софија Кенин.