Данска „златна“ во Струмица, македонските одбојкари со сребро во Европската лига
Вечерва во салата „Парк“ во Струмица во големото финале на Европската сребрена лига најдобрата македонска одбојкарска репрезентација загуби од Данска со резултат 1:3. Воедно после овој пораз останавме и без учество во Европската златна лига.
Избраниците на селекторот Никола Матијашевиќ добро го започнаа мечот освојувајќи го првиот сет од 25:23 и за предност од 1:0.
Данците успеаја да израмнат во вториот кој го добија со 19:25, а најмногу неизвесност имаше во третиот кој противниците го добија на два разлика со 25:27.
Во третиот сет нашата репрезентација имаше четири пати позитива од два разлика (17:15, 18:16, 19:17, 22:20), но ривалот не се предаваше и дојде до предност.
Домаќините мораа во четвртиот сет да бркаат израмнување, добар беше почетокот контролирајќи го резултатот во нивна корист (2:0, 3:1, 4:2, 5:3), но брзо се стопи позитивата. Потоа, се играше поен за поен, а еден од клучните периоди на мечот беше кога при негатива од 17:18, Данска направи серија од 5:0 и целосно беше скршен нашиот отпор.
Во победничките редови најефикасен беше Мадс Кјед Јенсен со 32 поени, а за македонската селекција Никола Ѓоргиев реализираше 14. Претходно во борбата за третото место Унгарија со 3:2 беше подобра од селекцијата на Хрватска.