Двејн Џонсон, попознат како „The Rock“, дебитираше на Мет Гала во Њујорк со издание кое веднаш го привлече вниманието на модните критичари. Иако неговиот стајлинг со потпис на „Thom Browne“ беше впечатлив, најскапиот детаљ на него не беше облеката, туку часовникот чија вредност се проценува на неверојатни 3,3 милиони евра.

Џонсон го носеше моделот „Jacob & Co. Billionaire III“, еден од најраскошните часовници некогаш видени на скалите на музејот Метрополитен. Станува збор за парче накит кое тешко може да се нарече дискретен додаток. Со дијаметар од 54 милиметри, овој часовник е значително поголем од класичните машки модели, кои обично се движат меѓу 36 и 40 милиметри, часовникот е прекриен со точно 714 бели дијаманти со вкупна тежина од 129,61 карати, а само на нараквицата од часовникот се наоѓаат 504 дијаманти.

Стилистката на актерот, Иларија Урбинати, изјави дека изборот паднал токму на овој модел бидејќи совршено одговара на неговата физичка појава. Таа го опиша часовникот како „буквално масивен“ и додаде дека Џонсон е веројатно единствената личност која може да носи ваква големина на раката без тоа да изгледа нападно.

Статусен симбол на Мет Гала

Моделите на „Jacob & Co. Billionaire“ веќе станаа традиција на овој престижен настан. Претходните години, Ашер носеше верзија со рубини, додека Малума се појави со модел украсен со смарагди. Верзијата на Џонсон со чисти бели дијаманти важи за најкласична, иако основачот на брендот, Џејкоб Арабо, го нарекува ова ремек-дело „крунскиот скапоцен камен“ на нивната куќа.