Во центарот на Скопје вечерва се случи тешка сообраќајна несреќа во која жена-пешак беше прегазена на пешачки премин кај гимназијата „Јосип Броз Тито“, објави Мета.

Возачот што го предизвикал инцидентот, веднаш по ударот, побегнал од местото.

Очевидци сведочат дека жената уредно поминувала преку пешачкиот премин кога во неа удрил џип кој не застанал. По ударот, возилото се оддалечило со голема брзина, оставајќи ја повредената жена да лежи на коловозот.

Екипа на Брза помош пристигнала брзо и ја пренела жената во Градската општа болница „8 Септември“. Засега нема официјални информации за нејзината здравствена состојба.

Од Министерството за внатрешни работи потврдија дека е во тек истрага за идентификација на возилото и возачот, при што се анализираат безбедносните камери од околината.