Тројца осудени убијци никогаш нема да бидат пуштени на слобода откако во затвор убија друг затвореник. Марк Фелоус (45), Ли Њуел (57) и Дејвид Тејлор (64) минатата година во строго обезбедениот затвор во Западен Јоркшир со импровизирани ножеви до смрт го избоделе Кајл Беван, а потоа го „покриле во кревет“ и го оставиле да искрвави, пишува Скај Њуз.

Беван (33) издржувал доживотна затворска казна со минимален рок од 28 години поради убиството на Лола Џејмс, двегодишната ќерка на неговата партнерка, во Хаверфордвест, Пемброкшир, во 2020 година. Фелоус и Њуел веќе издржувале доживотни казни без можност за условно ослободување кога го убиле Беван.

Сега, судијката Маура Мекгован им изрече „нови и одвоени“ доживотни казни без можност за ослободување поради убиството на Беван.

На Тејлор, за смртта на Беван, му беше изречена доживотна казна без можност за ослободување, покрај казните за делата поради кои во тоа време се наоѓал во истражен притвор.

Снимките од безбедносните камери покажале како тројцата обвинети на 4 ноември 2025 го следат Беван до неговата ќелија и излегуваат помалку од пет минути подоцна, „со задоволниот израз на луѓе кои ја завршиле работата“, рекле обвинителите.

Тејлор бил во истражен притвор поради убиството на 24-годишната Алиша Апостолоф-Бојарин, жена со која бил во врска, но која, како што тврдел, му здодеала, како и поради обид за убиство на полицаец во просторија за испрашување во друг строго обезбеден затвор.

Во февруари годинава Тејлор ја признал вината за убиството на Апостолоф-Бојарин, една недела пред почетокот на судењето. Нејзиното тело никогаш не било пронајдено, а Тејлор бил последната позната личност која била во контакт со неа на денот кога исчезнала.

Шеесет и четиригодишниот Тејлор претходно тврдеше дека таа е жива и живее во друг дел од земјата.

„Да, виновен сум“, изјавил на судот во Манчестер.

Роден е во Глосоп, а претходно живеел во Ештон-андер-Лајн. Ја познавал Апостолоф-Бојарин и тврдеше дека таа била девојка на синот на негов пријател.

„Јас сум старомоден криминалец“

Тејлор негирал дека имал намера да го убие детективот и рекол дека „полудел“ и експлодирал од бес бидејќи полицијата му „местела“, но поротата го прогласила за виновен за обид за убиство.

За време на судењето им рекол на поротниците дека е „старомоден криминалец“ со долг список претходни пресуди и дека „отсекогаш бил малку наклонет кон тепачки“.

Во август 2007 година бил осуден за тешка кражба со провала и недозволено поседување офанзивно оружје.

Фелоус единствен лично се појавил на суд

На Њуел во 2013 година му била изречена доживотна казна без можност за ослободување откако задавил затвореник кој убил дете и потоа го оставил во кревет – случај што, според судот, има „морничава сличност“ со смртта на Беван. Првпат завршил во затвор за убиство во 1989 година, кога ја задавил својата сосетка затоа што одбила да му даде пари.

Фелоус, платен убиец познат како „Декстер од Вејкфилд“, извршил две мафијашки убиства и во 2019 година добил доживотна казна без можност за ослободување. Пред убиството на Беван побарал преместување од Вејкфилд бидејќи бил незадоволен од условите во затворот.

Фелоус бил единствениот од тројцата што лично се појавил на денешното рочиште, додека Њуел и Тејлор учествувале преку видеоврска од затвор. Сите тројца биле снимени од безбедносните камери. На денот на смртта, камерите го снимиле Беван како влегува во својата ќелија, а веднаш по него влегуваат и тројцата обвинети.

„Беше убаво да работам со тебе и со Ајсмен“

Тројцата излегле од ќелијата помалку од пет минути подоцна, „како ништо да не се случило“. На снимките се гледа како си подаваат рака и, според обвинителството, си честитаат меѓусебно.

Судот слушнал дека не е познато „кој што направил“ во ќелијата, но дека најверојатно некој го држел Беван за рацете додека бил избоден 25 пати со најмалку две различни оружја.

Њуел имал повреда на раката, а Фелоус бил снимен како ги подвива ногавиците откако сфатил дека се извалкани со крв. Поротата слушнала дека едно од оружјата, направено од свиткано парче метал од задната страна на телевизор, било пронајдено пред ќелијата на Беван со неговата крв на него.

Сепак, оружјето со кое била нанесена смртоносната повреда никогаш не било пронајдено.

ВИДЕО | Немири во Британија по убиството на студент, демонстрантите тргнаа кон куќата на убиецот