Надзорниот одбор на „БМВ“ денес го назначи Милан Недељковиќ за нов извршен директор на германскиот автомобилски концерн, одлука која ќе стапи во сила од 14 мај 2026 година, пренесе „НИН“.

Недељковиќ работи за „БМВ груп“ од 1993 година, соопшти компанијата. Сегашниот извршен директор, Оливер Ципсе, ќе поднесе оставка, по меѓусебен договор со надзорниот одбор, на крајот на 13 мај 2026 година – денот планиран за годишното собрание на акционерите во 2026 година.

Претседателот на Надзорниот одбор на „БМВ“, Николас Петер, рече дека Недељковиќ носи јасна стратешка визија, силна способност за спроведување планови и силен претприемачки начин на размислување.

Милан Недељковиќ (роден во Крушевац, Србија) е член на Управниот одбор на групацијата, каде што е одговорен за производството, од 2019 година. 56-годишниот менаџер ја започнал кариерата во „БМВ“ како практикант во 1993 година и стекнал богато меѓународно искуство во текот на годините.

Тој имал голем број високи позиции, вклучувајќи: директор на фабриката во Оксфорд, директор на фабриката во Лајпциг и Минхен и раководител на одделот за корпоративен квалитет. Неговиот договор како претседател на Управниот одбор е со важност до 2031 година.