Летните месеци секоја година носат и зголемување на одредени инфекции, на кои во прилог им одат топлината, влажноста и оштетената кожа. Деновиве актуелно е импетигото, попознато како „слатка краста“, откако лекарите во Сплит предупредија за зголемен број болни деца, објавија хрватските медиуми, повикувајќи се на епидемиолозите од Наставниот завод за јавно здравје на Сплитско-далматинската жупанија.

Иако многумина мислат дека станува збор за болест што се пренесува преку морската вода, експертите предупредуваат дека тоа не е случај. Морето не е причина за импетиго, туку околностите што ги носи летото – повеќе време поминато на отворено, потење, мали гребнатини, каснувања од комарци, детска игра на плажата, како и споделување крпи или други лични предмети, пишува хрватски „Јутарњи“.

Како што наведува „МСД мануал“, еден од најпознатите медицински прирачници во светот, импетигото е површинска бактериска инфекција на кожата што најчесто ја предизвикуваат бактериите Staphylococcus aureus и Streptococcus pyogenes.

Најчесто се појавува кај децата, а првите знаци се мали плускавци или ранички кои набрзо пукаат и се прекриваат со карактеристични жолтеникави, т.е. „медени“ красти.

Бидејќи станува збор за многу заразна инфекција, лесно се пренесува преку директен контакт со кожата или преку крпите, облеката и другите предмети што ги користи заразено лице. Поради тоа, лекарите препорачуваат детето со потврдено импетиго да не се враќа во колективот додека не започне третманот и додека повеќе не е заразно.

Не е само импетигото честа појава во текот на летото

Иако импетигото е во центарот на вниманието во последните денови, не е единствената болест што се појавува почесто во лето отколку во остатокот од годината.

Лекарите секоја година бележат зголемен број случаи на воспаление на надворешното уво, попознато како „пливачко уво“. Проблемот настанува кога водата подолго останува во ушниот канал, создавајќи услови поволни за развој на бактериите. Првите симптоми најчесто се чешање, чувство на исполнетост во увото и болка што се интензивира при допир.

Британската Националната здравствена служба (НХС) советува темелно да се исушат ушите по капењето и да се избегнува употреба на стапчиња за уши, бидејќи тие можат да ја оштетат чувствителната кожа на ушниот канал и да го зголемат ризикот од инфекција.

Топлината и влажноста, исто така, се поволни и за развој на фоликулитис, т.е. воспаление на коренот на влакното, кое се манифестира со мали црвени мозолчиња, најчесто на места каде што влажниот костим за капење долго време останува блиску до кожата. Затоа, експертите препорачуваат по пливањето што е можно побрзо да се пресоблечете во сува облека, особено кога станува збор за деца кои со часови остануваат на плажа по излегувањето од морето.

Посебна претпазливост со отворените рани

Посебна претпазливост се препорачува кај луѓето со отворени исеченици, гребнатини или свежи хируршки рани. Оштетената кожа е природен влез за бактериите, па затоа лекарите препорачуваат да почекате со капењето додека раната не заздрави.

Ако по престојот на море се појават црвенило, оток, болка или исцедок околу раната, треба да се јавите кај лекар.

Инфекциите на очите и кожата се исто така почести

Летото носи и поголем број воспаленија на очите. Солта, песокот и другите иританти често предизвикуваат привремена иритација, но понекогаш се развива бактериски или вирусен конјунктивитис. Ако со црвенилото се појави болка, чувствителност на светлина или гноен исцедок, неопходно е да се побара совет од лекар.

Ниту стомачните проблеми не се исклучени, иако тие не се предизвикани само од морето. Тие можат да се појават ако се проголта микробиолошки загадена морска вода.

Дерматолозите нè потсетуваат дека габичните инфекции на кожата се исто така почести во лето, но причината не е морската вода. Многу поголема улога играат долготрајното носење мокар костим за капење, мократа кожа, како и заедничките тушеви и соблекувални, каде што габите полесно се пренесуваат.

Морето не е проблем, туку лошите навики

Иако сето ова може да звучи загрижувачки, експертите истакнуваат дека нема причина за страв. Со години Јадранското се смета за едно од најквалитетните мориња во Европа, а повеќето летни инфекции можат да се спречат со многу едноставни навики.

Туширањето по капењето, соблекувањето на влажниот костим за капење, користењето на сопствена крпа и избегнувањето капење со отворени рани честопати се доволни за да се сведе ризикот од инфекција на минимум.

Како што велат лекарите, летото не е период кога треба да се избегнува морето, туку време кога треба да се обрне поголемо внимание на хигиената и првите промени на кожата. Токму брзото препознавање на симптомите обично значи и поедноставно и поуспешно лекување.

Од базените демнат опасни зарази: Eдна работа не смеете да ја прескокнете за да бидете целосно сигурни

Вирусна инфекција што лесно се „закачува“ на базен — се пренесува преку крпите, дури и преку плочките