Швјонтек ќе ја брани титулата на „Ролан Гарос“ против Мухова
Тенисерката број еден во светот, Ига Швјонтек ќе игра за својата четврта Грен слем титула во кариерата, а трета на „Ролан Гарос“, откако со 6:2, 7:6 (7) ја совлада Бразилката Беатриз Хадад Маја денеска во второто полуфинале во женска конкуренција.
Швјонтек ќе ја брани титулата од минатата година против Каролина Мухова, која во првото полуфинале ја победи втората тенисерка во светот Арина Сабаленка.
Победата на Швјонтек, заедно со поразот на Сабаленка, значи и дека полската тенисерка ќе остане на првото место на ВТА листата без разлика на резултатот од финалниот меч.
На почетокот на мечот од ова полуфинале, тенисерките си разменија брејк, пред Швјонтек да врзе четири гема и го доби првиот сет со 6:2.
Хадад Маја пропушти една брејк топка во првиот гем од вториот сет, но првата брејк топка ја претвори во третиот гем и поведе со 2:1. Тенисерката од Полска возврати во шестиот гем и израмни на 3:3, па тој дел од играта беше решен во тај-брејк, во кој подобра беше Швјонтек со 9:7.