Светот никогаш не бил во подобра позиција да стави крај на пандемијата на Ковид-19, изјави денеска генералниот директор на Светската здравствена организација (СЗО) Тедрос Аданом Гебрејесу, кој ги повика земјите да истраат во борбата против вирусот од кој досега починаа повеќе од шест милиони луѓе.

„Сè уште не сме таму, но крајот е на повидок“, рече Тедрос на виртуелна прес-конференција.

Бројот на смртни случаи од Ковид-19 минатата недела беше најмал од март 2020 година, објави СЗО.

Претставникот на СЗО, Марија Керхове, рече дека се уште се очекуваат бранови на Ковид-19, но дека светот има свои начини на борба, како што се вакцини и антивирусни лекови за спречување сериозни состојби кај пациентите.

Се намалува и бројот на заболени од мајмунски сипаници, но Тедрос повика на будност и продолжување на борбата против болеста.

„Како и со Ковид-19, ова не е момент за опуштање, мора да останеме будни“, рече Тедрос.