Откако ги завршија клупските обврски, браќата Ѓорѓиеви му се приклучија на македонскиот репрезентативен одбојкарски табор кој се подготвува за јануарските квалификации за Европското првенство во 2021 година.

Пристуството на коректорот и капитен Никола Ѓорѓиев, како и на техничарот Ѓорѓи Ѓорѓиев, ќе им овозможи на селекторот Матијашевиќ и на неговиот асистент Николиќ да одржуваат посилни и покомплетни тренинзи во пресрет на турнирот во Скопје од 11-16 јануари, кога во конкуренција на Турција и на Босна и Херцеговина, македонските одбојкари ќе се обидат вторпат да се пласираат на континенталените самити.

Претходно, утре и задутре нашата селекција ќе ја тестира формата на два пријателски натпревари во Скопје против подмладениот состав на Бугарија.

Ѓорѓиев оптимист за пласман на ЕП: Шансите на Македонија се големи!

Потоа, македонските одбојкари ќе останат во изолација и ќе работат во арената „Борис Трајковски“ до 5-ти јануари кога ќе одат во Софија, каде што на Бадник и на Божиќ ќе одиграат уште еден тест двомеч со бугарскиот тим, кој исто како и ние, преку квалификации во јануари треба да го заработи задоволството да учествува на континенталниот шампионат во септември во Полска, Чешка, Естонија и Финска.

На софиските контроли, италијанскиот стратег Силвано Пранди, кој е на чело на бугарската репрезентација, се очекува да го искористи целиот играчки потенцијал на којшто смета за квалификациските дуели со Австрија и Израел.

Дотогаш и македонската репрезентација ќе биде комплетна, затоа што по Нова година е планирано да пристигне техничарот Филип Деспотовски, кој и натаму има клупски ангажман во Грција.