Тестото за пица е совршено кога се прави со квасец. Тогаш тоа нараснува и пицата станува мека, а додатоците едноставно пропаѓаат во „облакот“ од тесто. Потребни ви се 4 шолји брашно, 1 лажица шеќер, 4 лажици масло или растопен путер, 1 јајце, 20 г квасец, пола лажичка сол, една шолја свежо млеко или вода.

Во сад ставете ја течноста и растворете го квасецот. Додајте ги солта, шеќерот и јајцето, промешајте, па додајте го просеаното брашно. Мешајте да добиете воедначено тесто. По потреба додајте уште течност (вода или млеко).

На крај додајте го загреаниот путер или масло, измешајте, поклопете и нека стасува на топло два часа. Потоа лесно притиснете го тестото да спласне малку. Па по еден час извадете го на работна површина посипана со брашно и расукајте кора. Освен што температурата во собата каде стасува тестото треба да е од 10-35 степени, не треба да додавате повеќе сол или шеќер бидејќи тестото полека ќе се крева или воопшто нема да се крене. Ако ставите премногу вода тогаш нема да можете да го расукате, а ако претерате со брашното, ќе е жилаво. Маслото е задолжително бидејќи така тестото ќе остане меко. Најдобро е маслиново масло бидејќи дава посебен вкус.

Никогаш не користете замрзнати производи за фил, тие го расипуваат вкусот на пицата. Пицата се пече во загреана на максимум рерна и плехот се врти неколку пати за да не изгори од едната страна, а од друга да остане недопечена. Ако почне да се зацрвенува на површината покријте ја со фолија додека се испече цела.