Евровизија сепак со публика: 3.500 лица со негативен ковид тест ќе можат да присуствуваат во живо
Со почитување на епидемиолошките мерки и со негативен тест на Ковид-19, на 3500 лица ќе им биде дозволено да присуствуваат на овогодинешното издание на Евросонг во холандскиот град Ротердам во мај.
Како што наведува „Ројтерс“ овој настан ќе биде дел од групата настани и манифестации кои во Холандија се одржуваат под називот „филдлаб“, а во кои им се овозможува на мали групи луѓе да влезат во театар, конференциски центри, културни настани и на фудбалски натпревари под строг надзор.
Организаторите на Евровизија претходно потврдија дека поединечните настапи ќе бидат одржани во Ротердам на 18, 20 и 22 мај, со одржување на физичка дистанца, но без прецизирање дали ќе биде дозволено присуство на публика.
Како што наведува холандскиот весник „De Telegraf“, повикувајќи се на извори од владата, на пробите, полуфиналето и финалето ќе може да присуствуваат најмногу 3500 луѓе кои живеат во Холандија.
Оваа година во Ротердам на Евровизија ќе учествуваат вкупно 39 земји, а сите они кои ќе сакаат настанот да го следат во живо ќе мора да имаат негативен тест на Ковид-19.