Ученикот Даниел Христов од СОУГ „Славчо Стојменски“ од Штип оствари неверојатен меѓународен успех, освојувајќи престижна пофалница на 58. Меѓународна олимпијада по хемија, која годинава се одржа во Ташкент, Узбекистан, пишува „Умно“.  Покрај големиот успех на штипјанецот, со признанија се закитија и Теона Ана Георгиевска од ПСУ „Јахја Кемал“ од Скопје која освои бронзениот медал, Даниел Христовски од ПСУ „Јахја Кемал“ од Скопје кој доби пофалница и Георги Николоски од СОУГ „Мирче Ацев“ од Прилеп кој исто така доби пофалница.

Во конкуренција од дури 363 ученици кои допатуваа од 93 држави од целиот свет, македонскиот тим уште еднаш докажа дека нашите средношколци рамноправно се носат со најголемите светски умови. Македонската експедиција од Узбекистан се враќа со еден бронзен медал и три пофалници.

Зад овој огромен успех на нашите тинејџери стојат сериозни подготовки организирани од Сојузот на хемичари и технолози на Македонија, како и несебичната поддршка од поранешни олимпијци, студенти, асистенти и професори од Институтот за хемија при ПМФ во Скопје.

Успехот на младиот Даниел Христов е огромна гордост и потврда дека со труд, дисциплина и талент, границите не постојат.