„Меси-инг“ — Светското првенство во фудбал поттикна нов тренд на апликациите за запознавање
Светското првенство во фудбал не ги полни само стадионите, туку и апликациите за запознавање. Ова лето, платформите за состаноци во САД бележат значителен пораст на активноста, а експертите овој феномен го нарекоа „Меси-инг“ (Messi-ng) – тренд инспириран од името на аргентинската фудбалска ѕвезда Лионел Меси.
Препорачано
Според порталот „Машабл“, во градовите домаќини на Светското првенство има значително повеќе „допаѓања“, повлекувања на профили и нови совпаѓања во споредба со истиот период минатата година.
Во САД бројот на корисници на апликациите за запознавање пораснал за повеќе од 15 проценти, активноста е зголемена за околу 25 проценти, а бројот на нови совпаѓања е речиси 60 проценти поголем во споредба со јуни 2025 година.
Терминот „Меси-инг“ не се однесува директно на Лионел Меси, туку на атмосферата што ја создава Светското првенство.
Според сексуалната едукаторка Кортни Бојер, кога луѓето патуваат, слават и се опкружени со навивачи кои ја делат истата емоција, тие природно стануваат поотворени за нови познанства.
„За мене, ‘Меси-инг’ не е директно поврзан со Лионел Меси. Станува збор за она што се случува кога луѓето ќе се најдат во средина исполнета со нови доживувања и возбуда. За време на Светското првенство луѓето патуваат, слават и се опкружени со други со кои веќе делат силно емоционално искуство. Таа комбинација природно ги прави поотворени за поврзување, без разлика дали станува збор за разговор во бар или запознавање преку апликација“, објаснува Бојер.
Таа додава дека успехот на фудбалските аутсајдери може да ги охрабри и оние што бараат љубов.
„Кога репрезентации како Зеленортските Острови стигнуваат толку далеку, тоа им дава надеж и на луѓето што бараат партнер – ако тие можат да постигнат нешто неочекувано, можеби можам и јас“, вели Бојер.
Иако трендот го носи името на Меси, експертите нагласуваат дека тој не е поврзан со самата фудбалска ѕвезда, туку со еуфоријата што ја создава Светското првенство.
„Светското првенство не ги тера луѓето да се вљубуваат во фудбалери, иако… дали го видовте Мадука Окоје? Тоа создава емоционални услови што ги прават луѓето поотворени за нови познанства“, додава Бојер.
Според неа, големите спортски настани им даваат на луѓето чувство дека е сосема природно да бидат подруштвени, поспонтани и пооптимистични кога станува збор за љубовта, а апликациите за запознавање стануваат само продолжение на таа позитивна енергија.
