Со најновото ажурирање на оперативниот систем, „Епл“ воведе нова функција која може да стави крај на честото преспивање, особено кај корисниците што носат паметен часовник додека спијат, пишува „Лед бајбл“.

Станува збор за опција што овозможува алармот за будење истовремено да се активира и на телефонот и на паметниот часовник, комбинирајќи вибрации на раката со гласен звучен сигнал од уредот.

Досега, корисниците што користат распоред за спиење добиваа аларм само преку вибрации на „Епл“ часовникот, што е потивка и попријатна опција, но не секогаш доволна за оние со длабок сон.

Новата функција го решава токму овој проблем – вибрацијата останува, но истовремено се активира и звучен аларм на телефонот, што значително ги зголемува шансите корисникот навистина да се разбуди.

Важно е да се нагласи дека опцијата не е вклучена автоматски и мора рачно да се активира во поставките. Таа ќе биде достапна само доколку е поставен распоред за спиење и часовникот е поврзан со телефонот.

Функцијата може да се вклучи преку апликацијата за здравје или преку поставките за аларм, а корисниците треба да проверат и дали не е активиран тивок режим или некој друг режим што може да го спречи звучењето на алармот.

Според технолошките аналитичари, ова е едно од најпрактичните подобрувања во последниот период, бидејќи директно решава реален проблем – ризикот од преспивање, особено кај луѓето што се потпираат само на вибрации.

Новата опција би можела значително да им помогне на корисниците да не доцнат на работа или обврски, комбинирајќи удобност и сигурност во едно решение.