Независниот синдикат на државната администрација на Македонија денеска соопшти дека во Министерството за економија и труд е потпишан нов Колективен договор со кој е планиран раст на платите на административните службеници во етапи со вкупното покачување што ќе достигне 21% до 2028 година. Според договореното, платите на административните службеници во Министерството ќе се зголемуваат етапно во следните три години, и тоа 7% зголемување од 1 март 2026 година, дополнителни 7% од 1 март 2027 година и уште 7% зголемување од 1 март 2028 година.

Од синдикатот истакнуваат дека е неопходна рамнотежа на платите меѓу јавниот и приватниот сектор и дека државата мора да создаде деловна клима што ќе му овозможи и на приватниот сектор да го следи трендот на раст.

-Силната економија се потпира на два столба: задоволен работник во приватниот сектор и ефикасен службеник во јавната администрација – наведуваат од синдикатот.

Покачувањето на платите, според нив, подразбира и зголемена одговорност кај службениците, при што фокусот во наредниот период ќе биде ставен на бескомпромисно спроведување на законите и подзаконските акти, професионализација на органите на управата и обезбедување администрација која е сервис, а не бариера за граѓаните и бизнисите.

Од синдикатот додаваат дека реформите ќе продолжат со цел создавање достоинствени услови за работниците и воспоставување ред и ефикасност во институциите.

Минчев: Факт е дека платите во администрацијата се мали, но бараните 30 отсто се преголема сума

Покачувањето на платите беше договорено пред неполни два месеци кога премиерот Христијан Мицкоски по средбата во Владата со репрезентативните синдикати на администрацијата соопшти дека е постигнат значаен договор со синдикатите УПОЗ и САДУ, со кој се предвидува етапно покачување на платите за вработените во администрацијата, судовите и обвинителствата.

– Ова е поширок пакет кој опфаќа околу 11.000 вработени. Владата, како најголем работодавач, воспоставува договор кој гарантира достоинствено ниво на плати. Ова е историски момент бидејќи досега никогаш не сме имале ваков долгорочен план за усогласување на примањата – изјави тогаш Мицкоски.

Платите на вработените кои немаат статус на административни службеници ќе се уредуваат согласно Законот за минимална плата и општите прописи за работни односи.
Колективниот договор предвидува и бројни бенефити за вработените, меѓу кои: додатоци на плата за ноќна работа, сменска работа, работа во денови на празници и прекувремена работа, јубилејни награди, гаранции за заштита од вознемирување на работното место, мерки за заштита и безбедност при работа, уредување на платени и неплатени отсуства и друго.