Стотици илегални мигранти, блокирани на отворено во близина на босанскиот град Бихаќ, почнаа штрајк со глад и одбија да се сместат во шатори, објавија медиуми во БиХ.

Припадници на босанската војска вчера поставија десет големи шатори, како времено засолниште за околу 900 илегални мигранти. Сепак, мигрантите организираа протест со барање за подобро сместување. Тие одбија да ја прифатат храната обезбедена од Црвениот крст.

Босанската Влада побара мигрантите да бидат сместени во поранешниот прифатен центар „Бира“ во Бихаќ, но локалните власти категорично го отфрлија таквиот предлог. Уште еден обид за префрлање на мигрантите во напуштени бараки во близина на херцеговскиот град Коњиц, исто така, не успеа откако локалните жители во знак на протест го блокираа пристапот до објектите.