Ноќното небо над Тајпеј беше осветлено со спектакуларно светлосно шоу на дронови, кое привлече внимание кај жителите и туристите што престојуваа во градот. Импресивниот настан беше организиран по повод саемот „Компјутекс Тајпеј“, една од најголемите технолошки изложби во Азија, која секоја година ги собира водечките компании и иноватори од светот на технологијата, пренесува „Алџезира“.

Снимките од настанот покажуваат стотици дронови кои со прецизна координација создаваат фигури на огромен робот, автомобил и планетата Земја, претворајќи го ноќното небо во вистинско платно за светлосна уметност.

Посебен впечаток остави и прочуениот облакодер „Тајпеј 101“, кој како позадина на шоуто дополнително ја нагласи футуристичката атмосфера и ги воодушеви посетителите.

„Компјутекс“ е познат како место каде што се претставуваат најновите достигнувања во областа на вештачката интелигенција, компјутерската технологија, роботиката и другите современи иновации, а и годинава саемот ги оправда очекувањата на посетителите.

Присутните имаа можност одблиску да ги видат најновите прототипови, интерактивни демонстрации и технолошки решенија кои се очекува да ја обликуваат иднината.

Според организаторите, овогодишното издание на саемот привлекло рекорден број учесници, со повеќе од 6.000 компании од секторите на вештачката интелигенција, компјутерската технологија, роботиката и другите технологии од новата генерација, со што уште еднаш е потврден статусот на „Компјутекс“ како еден од најзначајните технолошки настани во светот.