Поп-ѕвездата Аријана Гранде се појавува во првиот трејлер за новата комедија „Во сродство со Фокер“ (Focker In-Law), каде настапува заедно со Бен Стилер и Роберт де Ниро.

Филмот претставува продолжение на хит-франшизата „Запознај ги родителите“ (Meet the Parents), која го следи ликот на Грег Фокер (Стилер) и неговите обиди да се вклопи во семејството на својата партнерка, предводено од строгиот татко, ликот на Де Ниро. Оригиналниот филм оствари огромен успех со заработка од над 330 милиони долари и доби уште две продолженија.

Во „Во сродство со Фокер“, Гранде ја толкува Оливија Џонс – девојка на синот на Фокер, која веднаш остава силен впечаток врз семејството. Нејзиниот лик е амбициозен и успешен, а открива дека е обучена како преговарач во заложнички ситуации во ФБИ.

Сепак, токму нејзината блискост со ликот на Де Ниро создава напнатост со Фокер, кој не е сигурен дали може да ѝ верува, додека остатокот од семејството целосно ја прифаќа.

На промоцијата во Лас Вегас, Стилер на шега изјави дека „можеби тој е новиот де Ниро во франшизата“, по што легендарниот актер се појави на сцената и предизвика аплауз кај присутните. Де Ниро, пак, ја пофали Гранде, нарекувајќи ја „веројатно најсмешниот партнер со кој имал можност да глуми“.

Филмот „Во сродство со Фокер“ треба да пристигне во кината за Денот на благодарноста, а според првите реакции, се очекува да донесе нова доза хумор во веќе добро познатата филмска приказна.