Насилникот кој пред десетина дена фрлаше камења кон даночни контролори дојдени на локалитетот Куклица кај Кратово, доби кривична пријава, соопшти МВР.

Тој, како што претходно соопшти Обвинителството, ги гаѓал со камења даночниците и кон нивното службено возило, а тие биле принудени да избегаат без да ја извршат планираната контрола.

Локалитетот Куклица пред неколку месеци беше тема во јавноста откако туристи се пожалија дека непозната жена им наплаќа влез, без да им издаде фискална сметка. Според информациите објавени во медиумите, сега пријавениот е сопруг на жената, Стојна Димитровска Боотх, кој има британско државјанство.

„ОВР Кратово поднесе кривична пријава Е.М.Б.(41) од Кратово поради постоење основи на сомнение за сторено кривично дело „спречување службено лице во вршење службено дејствие”. На 16.07.2026 во с.Куклица, кратовско, пријавениот со употреба на физичка сила и тврди предмети спречувал инспектори од Управата за јавни приходи додека извршувале службени задачи“, се вели во полициското соопштение.

Насилниците што наплаќаат кај „Куклица“ воделе проекти со ЕУ и со Министерството за животна средина — ќерката била кандидатка на Бачев