Фудбалерите на Вардар утре ќе го одиграат реваншот против Рига во рамките на второто квалификациско коло, со јасна цел да ја анулираат негативата од 3:2 од првиот натпревар во Скопје и да обезбедат пласман во следната рунда.

„Црвено-црните“ минатата недела прикажаа добра игра и беа рамноправен ривал на летонскиот претставник, но неколку грешки ги чинеа пораз. По средбата, тренерот Кристијан Фабијани оцени дека неговиот тим скапо ги платил сопствените пропусти, изразувајќи уверување дека тие нема да се повторат на реваншот.

Во пресрет на натпреварот, вардарци денеска го одржаа последниот тренинг на стадионот каде што утре ќе се одигра дуелот. Вардар ќе брка победа што ќе му донесе место во третото квалификациско коло за Конференциска лига, а почетокот на натпреварот е закажан за 19:00 часот.