Тежок инцидент забележала полицијата во струмичкото село Сарај, каде шестмина насилници од соседното Просениково упаднале во куќа со осумчлено семејство и ги нападнале домашните, меѓу кои имало и две деца. Двајца од насилниците тогаш се обиделе и да грабнат девојка од куќата и да ја однесат. Друг напаѓач, пак, им се нафрлил и на полицајците кои дошле да интервенираат, соопшти МВР.

Кривична пријава добиле „Б.Д.(22), Т.Ј.(49), С.Д.(47), В.М.(36), Г.Т.(42) и М.Т.(21), сите од село Просениково, Струмичко, поради постоење основи на сомнение дека сториле кривично дело „насилство“, против Т.Ј. и Г.Т. поради сомнение дека сториле и кривично дело „противправно лишување од слобода“, против Б.Д. поради постоење на сомневање дека сторил и кривично дело „напад врз службено лице при вршење работи на безбедноста““, велат од полицијата.

Покрај напаѓачите, ќе одговара и домаќинот на куќата, кој излегол на терасата и испукал два куршума во воздух со ловечка пушка, во обид да алармира за нападот.

„Пријавените, на 24.07.2026 околу 21:20 часот насилно влегле во домот на К.Ѓ. во село Сарај, Струмичко и физички ги нападнале К.Ѓ., З.Ѓ., Р.Ѓ., В.Ѓ., Б.М., Б.Ѓ. и две малолетни лица, при што им нанеле повреди на телото, а во еден момент Т.Ј. и Г.Т. се обиделе против нејзина волја да ја земат Р.Ѓ. со нив. Б.Д., исто така агресивно се однесувал и кон полициските службеници кои презеле службени дејствија за расчистување на случајот, при што физички нападнал и двајца од нив. Лицата се лишени од слобода и задржани во Полициската станица Струмица, а за случајот е известен јавен обвинител од Основното јавно обвинителство Струмица. За време на настанот К.Ѓ. излегол на терасата од куќата и со ловечка пушка испукал два куршуми во воздух, па по документирање и на овој настан против него ќе биде поднесена соодветна пријава“, пишува во полициското соопштение.

Почина 16-годишно момче од Скопско, без свест било примено на клиника