Властите во Венеција оваа туристичка сезона собраа повеќе од 5 милиони евра од влезната такса што ја плаќаат еднодневните посетители на популарниот италијански град.

Таксата, која изнесува од 5 до 10 евра, се наплаќа во 60 избрани денови во периодот од април до јули, кога бројот на туристи е најголем.

Според официјалните податоци, оваа сезона таксата ја платиле повеќе од 650.000 посетители. Во преостанатиот дел од годината, еднодневните туристи можат бесплатно да влезат во градот.

Градскиот функционер Симоне Вентурини предложи следната година влезната такса, во деновите кога се очекува особено голем број туристи, да се зголеми на од 30 до 50 евра.

Сепак, тој нема овластување самостојно да ја донесе таа одлука. Иако таксата е воведена со општинска одлука, максималниот дозволен износ е утврден со национален закон, па затоа за евентуалното зголемување ќе биде потребна согласност од италијанската влада во Рим.

Целта на мерката е подобро управување со масовниот туризам во градот, кој секоја година привлекува милиони посетители поради своето богато културно и историско наследство.

Денес во историското јадро на Венеција живеат речиси 50.000 жители, што е помалку од бројот на хотелски кревети во градот. Гостите кои престојуваат во хотели се ослободени од дневната влезна такса, но плаќаат туристичка такса за ноќевање.