Одредени пијалаци можат да придонесат за поквалитетен сон така што го смируваат умот и телото. Билните чаеви, како што се чајот од камилица и чајот од валеријана, како и топлото млеко, се меѓу најпопуларните избори поради нивните смирувачки својства, пишува „Хелт лајн“.

Добриот ноќен сон често се занемарува, иако е еден од најважните фактори за добро здравје. Експертите препорачуваат возрасните лица на возраст од 18 до 60 години да спијат најмалку од 7 до 9 часа секоја ноќ.

И премалку и премногу сон се поврзуваат со зголемен ризик од депресија, дијабетес, срцеви заболувања, па дури и предвремена смрт.

За жал, за многу луѓе не е лесно да спијат најмалку седум часа секоја ноќ. Во продолжение следуваат седум пијалаци кои можат да го поттикнат сонот.

1. Чај од камилица

Камилицата е растение со цветови слични на маргаритка и припаѓа на семејството Asteraceae.

Чајот од ова растение се користи со векови. Има бројни здравствени придобивки, меѓу кои ублажување на симптомите на настинка, намалување на воспаленијата и подобрување на здравјето на кожата.

Преглед на истражувања од 2024 година заклучил дека камилицата може да го подобри сонот, особено со намалување на бројот на будења во текот на ноќта и со олеснување на континуираното спиење. Сепак, не било забележано подобрување во времетраењето на сонот, ефикасноста на спиењето или дневното функционирање.

За подготовка на чај од камилица дома, додадете 4 супени лажици свежи (или 2 супени лажици суви) цветови од камилица во 1 шолја (237 мл) врела вода. Оставете да отстои околу 5 минути, а потоа процедете.

2. Чај од ашваганда

Ашвагандата важи за моќно лековито растение. Понекогаш се нарекува индиски женшен или зимска цреша и традиционално се користи во ајурведската медицина.

Потребни се дополнителни истражувања, но студија од 2021 година покажала дека екстрактот од ашваганда има мал, но статистички значаен ефект врз подобрувањето на сонот во споредба со плацебо.

Ќесички чај од ашваганда можат да се најдат во повеќето продавници за здрава храна.

Друг начин на консумирање е преку таканареченото „месечево млеко“ – традиционален ајурведски напиток против несоница, кој се подготвува со додавање ашваганда, кардамон, цимет и морско оревче во топло млеко.

3. Чај од валеријана

Валеријаната е повеќегодишно растение со миризливи розови или бели цветови и припаѓа на семејството на орли помине.

Како и кај ашвагандата, коренот од валеријана се користи како лековита билка која е позната по тоа што го поттикнува сонот и помага при несоница.

Преглед на 60 студии објавен во 2020 година заклучил дека валеријаната може да биде безбедна и ефикасна за подобрување на сонот и спречување нарушувања поврзани со него.

За подготовка на чај, потопете 2 до 3 грама сув корен од валеријана во 1 шолја (237 мл) топла вода. Оставете да стои 10 до 15 минути, а потоа процедете.

4. Чај од нане

Нането припаѓа на семејството Lamiaceae и е добро познато по својата широка примена во кулинарството. Пеперминтот е една од неговите најпознати сорти.

Со години се користи во традиционалната медицина. Се смета дека чајот од нане има антивирусни, антимикробни и антиалергиски својства. Исто така може да помогне при гастроинтестинални проблеми, како што се лошо варење и синдром на нервозно дебело црево.

За подготовка, зовријте 2 шолји (480 мл) вода и додајте рака свежи листови од нане. Количината може да ја прилагодите според тоа колку силен вкус сакате. Оставете ги листовите да стојат во топлата вода најмалку 5 минути.

5. Топло млеко

Можеби звучи како стар народен совет, но многу реномирани здравствени организации препорачуваат топло млеко за подобар ноќен сон.

Причината е што млекото содржи триптофан. Триптофанот природно го зголемува нивото на серотонин – невротрансмитер кој е поврзан со чувството на среќа и благосостојба. Освен тоа, серотонинот е претходник на мелатонинот – хормонот што го регулира сонот.

Со други зборови, триптофанот го зголемува нивото на серотонин, а тоа доведува до поголемо создавање мелатонин. Мелатонинот може да помогне при заспивање и да придонесе во борбата против различни нарушувања на спиењето, вклучувајќи џет-лег, нарушувања поради сменска работа и несоница.

Можно е и самиот ритуал на пиење чаша топло млеко пред спиење да делува смирувачки и да помогне полесно да се опуштите.

Доколку сакате да го испробате, изберете го омиленото млеко и загрејте го на тивок оган неколку минути.

Освен ако не сте интолерантни на лактоза или алергични на млеко, нема причина да не го испробате овој вечерен ритуал.

6. Бадемово млеко

Бадемите се јаткасти плодови богати со влакна, витамини и минерали. Бадемовото млеко е кремаста растителна алтернатива на кравјото млеко, која се добива со блендирање бадеми со вода и потоа процедување на смесата.

Бадемовото млеко содржи супстанции и минерали кои можат да го поттикнат сонот, меѓу кои триптофан, мелатонин и магнезиум. Една шолја (237 мл) содржи речиси 17 милиграми магнезиум.

Во последните години, магнезиумот покажува потенцијал како средство за третман на несоница, особено кај постарите лица.

Бадемово млеко може да се најде во повеќето маркети, а достапно е во различни вкусови и варијанти. Може да се подготви и дома.

Бидејќи се добива од бадеми, лицата кои имаат алергија на јаткасти плодови треба да го избегнуваат.

7. Смути од банана и бадеми

Бананите се уште една намирница богата со магнезиум, триптофан и мелатонин.

Со комбинирање банана и бадемово млеко во смути, се внесуваат триптофан и мелатонин, што потенцијално може да помогне во намалување на симптомите на несоница.

За подготовка потребни се:

• 1 свежа или замрзната банана
• 1 шолја (237 мл) бадемово млеко
• 1 супена лажица (15 грама) бадемов путер
• половина шолја мраз (ако користите свежа банана)

Овој едноставен рецепт е добра основа на која можете да додадете и други состојки богати со магнезиум и калиум, како што се зелен лиснат зеленчук, сок од портокал, темно чоколадо, јогурт или авокадо.

Доколку немате алергија на банани или бадеми, ова смути е здрав и вкусен начин да го завршите денот.

Понекогаш добриот сон лесно може да биде нарушен или тешко да се постигне. За среќа, многу пијалаци можат да послужат како природна помош за подобар сон. Некои од нив се богати со соединенија како триптофан и мелатонин, додека други го поттикнуваат спиењето така што ги намалуваат болката и непријатноста во вечерните часови.

Повеќето пијалаци што можат да придонесат за подобар сон се подготвуваат со неколку едноставни состојки за пет минути или помалку. Размислете да испробате некои од наведените пијалаци за да откриете кои најмногу ви одговараат.

Доколку и понатаму имате проблеми со спиењето, обратете се кај лекар. Тој може да помогне да се утврди причината за нарушувањата на сонот и да препорача соодветен третман или промени во животниот стил.

Изедете грст од ова јаткасто овошје еден час пред спиење и ќе заборавите на несоницата